Me xhaketa të trasha e kapele, nxënësit e shkollës “Ulina” po mbajnë procesin mësimor.
Për shkak të mosfunksionimit të ngrohjes qendrore, nxënësit e kësaj shkolle në fshatin Kosavë të Dragashit po mbajnë mësim në kushte të pafavorshme.
Ani pse këtu janë të vendosur radiatorët e pajisjet e nevojshëm për ngrohje me rrymë, ato ende nuk janë funksionale.
Por gjithçka ka mbetur pezull e një kabllo e cila kushton rreth 1 mijë euro.
Të shqetësuar me gjendjen janë prindërit e fëmijëve.
“Me ka tregu qe nuk kanë nxemeje, po nxehin drutë për mbi stufë, me jakne po rrijnë në klasë kjo është katastrofë. Me ka tregu se njëri nxënës nuk është duke ardhur për shkak të ftohjes, vjen në shtëpi afrohet tek stufa, nuk kanë nxemjes”, shprehet Rasim Mejzini.
Madje, Mejzini i cili ka një fëmijë në këtë shkollë kërkon që sa më parë të bëhet një zgjidhje.
“Na kanë lajmeru femija, atë shporetin e kan sjellë, por nuk e kanë instalu.Dimiri shkoj tash duhet me bo nje zgjidhej sa kam degju une është cëshja e 1 mijë euro që qatë nxemje qendore. Sa janë 1mijë euro për Komunën kur femijët janë në shkollë”, thotë ai.
E për t’u ngrohur, stufat me dru janë alternativa kryesore.
Por drutë të cilat i kanë të siguruar duhet paraprakisht të nxehen në këtë formë.
Kjo pasi ato janë të larguara dhe është e vështirë të ndizen e të ngrohin klasat.
“Na vazhdojmë të nxehem me dru, ndoshta janë pak të lakta dhe nuk po ndezën mirë, mirëpo nxemja është nxemje. Unë si drejtor i shkollës nuk kam marrë asnjë ankesë dhe po quditëm me ankesat. Kemi përdor edhe disa nxemje me rrymë i kemi shëtit klasë në klasë, kemi nejt edhe në pushim, por normal që është shkolla është pak me ftohtë seç duhet”, Dehar Guri-u.d i drejtorit të shkollës “Ulina”
Por drejtori pret që sa më parë të kryhet ky projekt.
“Projekti deri në një fazë është përfundua, pasi unë nuk kam njohur shumë se si ka shku procesi i tenderimit, por e di që ka mete puna me lidhjen e rrymës. Kam kontaktu disa herë më inxhinieret e komunës, dhe së fundmi ditën e enjten kam pas kontaktu. Sepse është problem, i një kabllo të dobët që është aty, dhe besoj edhe kjo do të përfundoj nashta është zgjatë pak procesi”, shprehet ai.
Nga drejtoria e Arsimit në Komunën e Dragashit thonë që projekti do të jetë i përfunduar gjatë këtij viti.
“Ky ka qenë projekt dy vjeqar 2023-2024. Në vitin paraprak(2023),punimet janë kryer sipas dinamikës së paraparë,kurse pjesa tjetër e punimeve do të kryhën këtë vit(2024) dhe projekti do të jetë i përfunduar”, ka thënë Zenih Krasniqi – drejtori i Arsimit në Dragash
E deri të përfundojë projekti, nxënësit e kësaj shkolle e cila gjendet në jug të Kosovës, do të vazhdojnë të mbajnë mësimin në temperatura të ulta.
