Kryetari i Nismës Socialdemokrate, Fatmir Limaj, ka folur për takimet e tij pas zgjedhjeve dhe për rolin e Nismës në negociatat për formimin e qeverisë, duke theksuar se partia e tij ka qenë e gatshme të mbështesë qeverinë, por pa u bërë pjesë e saj.
Limaj ka treguar se takimi i tij i parë pas zgjedhjeve ka qenë me kryesinë e Partisë Demokratike të Kosovës nga opozita. Ai ka theksuar se ka ofruar votat e Nismës për një qeveri të mundshme të ish-opozitës, por pa u përfshirë në koalicion.
“Takimi im i parë pas zgjedhjeve ka qenë me kryesinë e PDK-së nga opozita. Edhe në kafe u kam thënë se ne jemi të gatshëm të bëhet një projekt i një qeverie nga ish-opozita për t’iu lehtësuar juve. Bashkëbisedimi me forcat e tjera politike nuk na intereson, votat tona i keni, por nuk është e lehtë të ndërtohet një qeveri me 4-5 parti. Për të dëshmuar që duam të japim një mundësi, ulem edhe kur të keni konkurrentët mes dy forcave të mëdha, llogaritni që votat tona janë pa pjesëmarrjen tonë në qeveri,” ka thënë Limaj në emisionin “Këndi i debatit” në Tëvë1.
Ai ka shtuar se ka kërkuar që marrëveshjet për koalicion të bëhen një javë para se të fillonte parlamenti, siç ndodh zakonisht në politikën e vendit, dhe ka paralajmëruar se nuk do të pranonin të çonin vendin në zgjedhje për shkak të mungesës së marrëveshjes.
“Shpresoj që këtë punë ju e kryeni një javë para se të fillojë parlamenti, sikur bëhen marrëveshjet politike në këtë vend. Nëse nuk keni një marrëveshje një javë para kohe, ta keni parasysh, unë nuk e çoj vendin në zgjedhje nëse varet nga ne,” ka theksuar Limaj.
Tutje, Limaj ka folur edhe për takimin me kryeministrin në detyrë, Albin Kurti. Ai ka thënë se i ka ofruar votat e Nismës , por pa kërkuar asnjë pozitë në qeveri.
“Poashtu, kur jam takuar me Kurtin i kam thënë: ‘Çfarë po kërkoni? Nëse doni votat tona për një qeveri pakicës pa pasur asnjë vend për ne, unë jam i gatshëm t’i jap.’ Por Kurti ka thënë se na sheh si partner në qeverisje, dhe unë kam thënë se nuk dëshiroj të jem në qeveri,” ka deklaruar Limaj.
Deklaratat e tij nënvizojnë pozicionin e Nismës në procesin e krijimit të qeverisë së re dhe rolin e saj si faktor i rëndësishëm politik në Kosovë, që ofron mbështetje, por kërkon të ruajë pavarësinë politike.
