Deputeti i LDK-së, Avdullah Hoti ka thënë se menaxhimi i parasë publike nga Qeveria Kurti është duke u bërë si në kohën e socializmit.
Ai tha se kjo është si në sistemin “qeveria ta thyente këmbën, e mandej ta jepte një shkop për tu mbajtur”.
“Kjo e përshkruan në mënyrën më të saktë punën e kësaj qeverie. Ja pse:
-Për bizneset: I bllokoi projektet kapitale, si rezultat ekonomisë i mungojnë 500 mil euro, e mandej i ndihmoi bizneset me ligjin për indeksim të kontratave për investime kapitale. Rriti faturat e energjisë për bizneseve, e mandej i subvencionoi bizneset për energji.
-Për qytetarët: E shtrenjtoi dy herë energjinë, e në anën tjetër i subvencionoi për shpenzimet e energjisë. E dyfishoi tatimin në pronë, e mandej ua fali 100 euro”, ka shkruar ai.
Ai tha se kjo qasje e shpenzimeve publike është socialiste, sepse njerëzit po varfërohen dhe po bëhen të varur nga shteti. Socializëm është kur 41% e buxhetit shpenzohet në subvencione dhe transfere, e vetëm 15% në investime.
