Publicisti, Kim Mehmeti ka vlerësuar se Vjosa Osmani është presidentja më e mirë që ka pasur Kosova pas presidentit historik Ibrahim Rugova.
Në emisionin “Këndi i Debatit” në Tëvë1, Mehmeti ka thënë se Osmani e përfaqëson mirë vendin, njeh gjuhët dhe diplomacinë, duke e bërë atë një figurë që përfaqëson mirë interesat e qytetarëve.
Ai ka shtuar se, për dallim nga presidentja e mëparshme, Atifete Jahjaga, ku sipas tij mënyra e komunikimit shpesh ishte e pasigurt dhe nuk e përfaqësonte vetveten siç duhet, Osmani i jep qytetarëve një përfaqësim të qartë dhe të dinjitetshëm.
“Vjosa Osmani deri tani është presidentja më e mirë që ka pasur Kosova pas presidentit historik Ibrahim Rugova. E përfaqëson mirë vendin, njeh gjuhët dhe diplomacinë. Shkurt e shqip, ajo mua si shqiptar më përfaqëson mirë dhe ndjehem mirë, për dallim nga presidentja e mëparshme, ku kishe frikë se të turpëronte kur fliste. Nuk kam kundër që dikush ta pëlqejë, por e di që Atifete Jahjaga u nxor nga zarfi dhe ishte edhe faji i saj që nuk e njihte veten, duke dalë pastaj qesharake në intervista,” ka thënë Mehmeti.
