Publicisti, Kim Mehmeti ka thënë se situata në Theth, pas shembjeve të ndërtimeve pa leje, mund të radikalizohet shumë lehtë.
Sipas Mehmetit, nëse populli vendos ta kundërshtojë kryeministrin Rama nuk ka pushtet që mund ta ndalojë këtë lëvizje.
Ai e ka quajtur Ramën frikacak pasi për të sjellja e tij është tipike e një lideri të dobët, i cili përpiqet të duket i fortë duke ushtruar presion.
“Situata shumë lehtë mund të radikalizohet, por e mira është që të mos ndodhë ajo se nëse ajo ndodhë, atëherë Rama nuk do ta dijë se ku e ka kokën e ku e ka bishtin. Kur populli vendos që t’i pastrojë gjërat ashtu siç di ai, nuk ka pushtet që mund ta kundërshtojë dhe në fund të fundit kjo është rregull, aty ku pushtetmbajtësit sillen sikur piktori ata vetëm tregojnë se u ka ardhur fundi dhe këtë ua garantoj. Ai instinktivisht e ndien se i ka ardhur fundi dhe ai tash shkon në variantin t’i frikësoj sa më shumë, sepse i dobëti i zgjidh kështu problemet i forti nuk i zgjidh kështu problemet, i forti vjen atje dhe të thotë për pesë ditë këtë ndërtesë pa leje ta rrënosh ose ta rrënoj unë, por i dobëti vie kështu që të tregojë se është i fortë. Ky është një frikacak”, ka thënë ai në emisionin “Këndi i Debatit” në Tëvë1.
Ndryshe, Inspektorati Kombëtar i Mbrojtjes së Territorit (IKMT) në bashkëpunim me Policinë e Shtetit, gjatë javës ka nisur një aksion për shembjen e disa ndërtimeve pa leje në zonën e mbrojtur të Thethit, në veri të Shqipërisë.
Ndërhyrja ka shkaktuar tensione me banorët lokalë, disa prej të cilëve kanë kundërshtuar veprimin e autoriteteve duke kërkuar ndalimin e prishjes së objekteve që, sipas tyre, shërbejnë për zhvillimin e turizmit familjar.
Sipas IKMT-së, ndërtimet e shembura dhe ato që do të shemben kanë qenë në kundërshtim me ligjin, pasi janë kryer pa leje ndërtimi në një zonë të mbrojtur natyrore, pjesë e Parkut Kombëtar të Alpeve Shqiptare.
Ndërkaq, kryeministri Edi Rama lidhur me shembjen e ndërtimeve pa leje në Theth ka thënë se janë prishur 40 objekte pa leje, teksa theksoi se pronarët e tyre, sipas tij, nuk janë as banorë të zonës.
Rama ka shtuar se bëhet fjalë për ndërtesa për qëllime fitimi, teksa shtoi se policia ka nisur hetimet për të zbuluar se “kush është mbrapa pushtimit të zemrës së Thethit”.
“Nuk bëhet fjalë për disa të shkretë, bëhet fjalë për individë të cilët janë ngjitur deri atje dhe në një masë të konsiderueshme të rasteve nuk janë banorë të atij vendi dhe rasti flagrant që u bë shkak janë individë që as janë shfaqur të pretendojnë asgjë. Policia po heton si ka ndodhur dhe kush është mbrapa pushtimit të zemrës së Thethit dhe bëhet fjalë për ndërtime të cilat nuk janë për të futur kokën, po janë për qëllime fitimi. Nuk e di të ketë ndonjë teori që e amniston shkelësin e ligjit duke ja ngarkuar fajin strukturave të shtetit nëse nuk e kapin shkelësin në sekondën kur ai fillon bën shkeljen. Mbetet për të parë se çfarë përgjegjësie do të marrë KLP lidhur me zonjën Gjeli e cila nuk ka pranuar të fillojë as hetimet bazuar në denoncimet e bëra. Në Theth janë goditur 40 objekte dhe Policia ka një numër të konsiderueshëm denoncimesh të bëra në prokurori lidhur me këto objekte dhe prokuroria nuk ka ndërmarrë asnjë hetim”, ka deklaruar Rama.
