Publicisti Kim Mehmeti, në emisionin “Këndi i Debatit” në Tëvë1, komentoi zgjedhjet lokale dhe situatën politike në Maqedoni të Veriut.
Ai theksoi se BDI-ja e Çairit ka arritur të mbizotërojë mbi BDI-në e Zajasit dhe se VLEN-i, që përfaqëson Lëvizjen Demokratike, mbetet forca kryesore shqiptare në qeveri.
“VLEN-i është vetëm ajo që ka Lëvizja Demokratike, që do të thotë BDI-ja e Çairit. E kam thënë edhe më parë: lokomotiva e vërtetë e VLEN-it është Lëvizja Demokratike dhe kryetari i Çairit që u zgjodh atje. Në Çair, BDI-ja e Çairit e mundi BDI-në e Zajasit dhe shumë mirë ia bëri. VLEN-i nuk është gjë tjetër, përveç një lokomotive të fortë, siç është Lëvizja Demokratike, e cila zvarritet pas dy vagoneve të zbrazët që nuk i duhen askujt”, ka thënë ai në emisionin “Këndi i Debatit” në Tëvë1.
Mehmeti kritikoi gjithashtu rolin e VRMO-së dhe theksoi se shqiptarët me dinjitet politik shpesh nuk kanë vend në qeverisje.
“VRMO-ja erdhi në qeveri duke u premtuar maqedonasve se do t’ua kthejë Maqedoninë. Por kush ua kishte marrë sipas tyre? Shqiptarët. Dhe ua ktheu Mickoski. Jo vetëm kaq, por ai tashmë iu dëshmoi edhe diçka tjetër, që do t’i ‘zgjedhë’ edhe shqiptarët. Në Bërvenicë doli një djalë që duhet të ishte e ardhmja jonë politike, por e shkatërruan, sepse në Maqedoni nuk i duhet askujt një shqiptar me dinjitet. Këtu i duhet vetëm një shqiptar i dëgjueshëm. Ne shqiptarët po shkojmë drejt asaj situate që jo vetëm pesë ministra në qeveri, por edhe sikur pesë shoferë t’ua japësh, prapë VLEN-i do të mbetet në qeveri. Prandaj them se VRMO-ja është shumë e kujdesshme ndaj shqiptarëve, sepse mund të na poshtërojë deri në atë pike të kemi pesë shoferë ministrash në qeveri e prapë VLEN-i nuk del prej saj”, ka deklaruar Mehmeti.
