Ministri i Mbrojtjes, Armend Mehaj ka përkujtuar sot profesorin, Ukshtin Hoti në 24-vjetorin e zhdukjes së tij.
Mehaj ka thënë se vepra dhe jeta e Ukshin Hotit do të mbetet gjithmonë busulla e rrugëtimit tonë si shtet dhe si komb, raporton teve1.info
“Të pakta janë qeniet njerëzore ekzistenca e të cilëve lë gjurmë ndër breza, me një urtësi që të ngjallë siguri e hedhë dritë mbi vetëdijen shoqërore, duke shërbyer si një udhërrëfyes që përkundër çdo stuhie gjen rrugën drejt të interesave të përgjithshme që tejkalojnë individualen, të pjesshmen, e synojnë idealen”, ka shkruar Mehaj.
Përmes një postimi në Facebook, ai ka thënë se figura e Ukshin Hotit ka frymëzuar popullin e Kosovës dhe vazhdon të frymëzojë.
“Ukshin Hoti i tillë ishte, fanar i kombit shqiptar, figurë që na ka frymëzuar si popull dhe vazhdon të na frymëzojë edhe sot e kësaj dite. Vepra dhe jeta e Ukshin Hoti do mbetet gjithmonë busulla e rrugëtimin tonë si shtet e komb”, përfundoi ai.
Kujtojmë, se më 16 maj të vitit 1999 në rrethana ende të pandriçuara është zhdukur Ukshin Hoti.
Veprimtari i mirënjohur i Lëvizjes Kombëtare, profesori Ukshin Hoti u lind më 17 qershor të vitit 1943 në fshatin Krushë të Madhe të Rahovecit. Ishte profesor, shkrimtar, filozof, intelektual, atdhetar dhe veprimtar i shquar i çështjes kombëtare gjatë viteve 1981-1999.
Ukshin Hoti ka qenë edhe ligjërues ne disa universitete të Amerikës ku dhe kishte studiuar dhe diplomuar./teve1.info
