Ministri i Mbrojtjes, Armend Mehaj, është takuar me ministrin e Mbrojtjes së Forcave të Armatosura të Britanisë së Madhe, James Heappey, si dhe ambasadorin britanik, Nicholas Abbott.
Mehaj, ka bërë të ditur se në këtë takim është diskutuar për pika të ndryshme të zgjerimit të bashkëpunimit në fushën ushtarake, pjesëmarrjen në misione, stërvitje dhe trajnime të përbashkëta, si dhe shkollimin e kuadrove të reja ushtarake të FSK-së në Akademinë e Mbrojtjes të Britanisë së Madhe.
“Pas realizimit të sukseshëm të trajnimit të përbashkët në Ishujt Falkland shpreha para ministrit Heappey gatishmërinë tonë që FSK të marr pjesë edhe në misione të tjera përkrah Forcave të Armatosura Britaneze. E po ashtu temë tjetër diskutimi ishte dhe investimi në industrinë e mbrojtjes dhe blerjen e pajisjeve ushtarake të cilat po bëhen përmes marrëveshjeve shtet më shtet, sipas standardeve të NATO-s dhe në përputhje me Planin Gjithpërfshirës të Tranzicionit”, thuhet në postimin që ministri e ka publikuar në Facebook.
Po ashtu, Mehaj, ka thënë se ministri Heappey ka vlerësuar larë ndihmën e ofruar nga Kosova për evakuimin e refugjatëve afganë, e po ashtu mbështetjen e ofruar për trajnimin e ushtarakëve ukrainas në fushën e dominimit, kërkim-shpëtimit dhe eliminimit të materieve të rrezikshme si dhe fusha tjera që mund të kërkohen nga partnerët tanë.
“Ministri Heappey ndër të tjerash theksoi se Kosova do të ketë mbështetjen e vazhdueshme të Britanisë së Madhe në procesin e integrimit në programin e Partneritetit për Paqe, organizatat ndërkombëtare, para së gjithash në BE dhe në NATO”, ka shkruar ministri. /teve1.info/
