Në kuadër të vizitës zyrtare në Turqi, ministri i Mbrojtjes Armend Mehaj, ka vizituar Presidencën e Industrisë së Mbrojtjes, ku u prit nga presidenti i këtij institucioni Ismail Demir, me të cilin kanë nënshkruar marrëveshjen ndërshtetërore për furnizim me artikuj dhe produkte për shërbime të mbrojtjes.
Ministri Mehaj në Facebook ka thënë se kjo marrëveshje ka rol të jashtëzakonshëm në ngritjen e kapaciteteve të Forcës së Sigurisë së Kosovës.
“Presidencën e Industrisë së Mbrojtjes e njoftova me synimin e Kosovës për Integrimin Euro-Atlantik dhe anëtarësim në NATO. Në këtë proces mbështetja Republikës së Turqisë për Republikën e Kosovës është tejet e rëndësishme”, ka shkruar ai.
Kurse në njoftim thuhet se Demir ishte falënderues për bashkëpunimin dhe për konkretizimin e këtij bashkëpunimi me marrëveshje shtet me shtet.
