Ministri i Mbrojtjes, Armend Mehaj ka thënë se Forca e Sigurisë së Kosovës po zhvillohet për të përmbushur standardet e NATO-s për të kontribuar në ruajtjen e paqes dhe garantimit të sigurisë në vend, rajon dhe më gjerë.
Ai këto komente i ka bërë gjatë vizitës në Komandën e Forcave Tokësore në Istog i shoqëraur nga Komandantin e FSK-së, gjenerallejtënat Bashkim Jashari.
“Forca e Sigurisë së Kosovës po zhvillohet për të përmbushur standardet e NATO-s, ashtu që si ushtri të kontribuojë jo vetëm në ruajtjen e paqes dhe garantimin e sigurisë në vend, por gjithashtu në rajon dhe më gjerë”, ka shkruar Mehaj në Facebook.
Ata në Istog u pritën nga komandanti i KFT-së, gjeneral brigade Hysen Dreshaj.
Me këtë rast, Ministri Mehaj dhe Gjeneral Jashari i uruan gjeneral Dreshajt gradimin e po ashtu suksese në drejtimin e kësaj komande, që përbën elementin kyç luftarak tokësor.
Në këtë takim u theksua se duke qenë në fazën e dytë të implementimit të Planit të Përgjithshëm të Tranzicionit kërkohet shumë angazhim për të përgatitur ushtarët e rinj në aspektin profesional, e po ashtu për të ngritur kapacitetet humane përmes trajnimit të vazhdueshëm të ushtarakëve tanë. /teve1.info/
