Ish-ministri i Mbrojtjes së Kosovës, Armend Mehaj ka thënë se në situatën gjeopolitike asnjë betejë nuk fitohet dhe asnjë qëllim nuk arrihet pa partnerët ndërkombëtar.
Mehaj tha se Evropa duhet të forcohet në prodhim, kurse Kosova duhet të forcohet me miq, por të gjitha këto sipas tij duhet të ndodhin së bashku me ShBA-në.
“Sot, në situatën gjeopolitike, asnjë betejë nuk fitohet dhe asnjë qëllim nuk arrihet pa partnerë. E njëjta gjë vlen ushtarakisht, politikisht, financiarisht dhe diplomatikisht. Evropa duhet të forcohet në prodhim, Kosova duhet të forcohet me miq, por të gjitha këto duhet të ndodhin së bashku me SHBA-në. Sepse as SHBA-ja nuk mund të ecë përpara pa Evropën, e as Evropa pa SHBA-në. Këtë e kemi bërë më parë dhe duhet ta bëjmë përsëri!”, ka shkruar ai.
Madje, ai ka theksuar se Kosova ka vetëm një rrugë që duhet ta përfundojë e cila është anëtarësimi i saj në NATO.
“Kosova pa NATO-n s’mund të jetë e fortë, dhe NATO pa Kosovën s’mund të jetë e plotë. Askush nuk ka fuqinë ta zëvendësojë NATOn – ajo duhet vetëm të bëhet më e fortë, për të mirën e gjithë botës. Të gjitha shtetet e NATO-s kanë nevojë për njëri-tjetrin, dhe kjo vlen edhe për shtetet tona, për kombin tonë. Kosova ka vetëm një rrugë që duhet ta përfundojë – anëtarësimi në NATO si shteti i 33-të”, theksoi Mehaj./teve1.info/
