Në Ramshtajn të Gjermanisë me pjesëmarrjen e mbi 50 shteteve u mbajt takimi i radhës i Grupit të Kontaktit për Mbrojtje të Ukrainës, i udhëhequr nga sekretari i Mbrojtjes së ShBA-së, Lloyd Austin.
Në këtë takim kanë marrë pjesë ministri i Mbrotjes, Armend Mehaj dhe gjeneral Bashkim Jashari si përfaqësues të Kosovës.
Mehaj tha se temë diskutimi ishte vazhdimi i mbështetjes për Ukrainën, strategjia që duhet ndjekur në raport me kërcënimet dhe rreziqet nga politikat ekspansioniste të Rusisë, si dhe kontributin e shteteve në fusha të caktuara për mbështetje të Ukrainës dhe forcave të saj të cilat ndodhen në betejë, transmeton Klan Kosova.
“Në këtë aspekt Ministria e Mbrojtjes rikonfirmoi gatishmërinë për mbështetje nga Republika e Kosovës në fushën e deminimit, kërkim-shpëtimit dhe menaxhimit të materieve të rrezikshme si dhe ofrimin e trajnimeve për secilën nga fushat e lartcekura”, tha Mehaj.
Sipas Mehajt, Kosova mbetet e përkushtuar të ofrojë gjithë mbështetjen në ruajtjen e paqes dhe stabilitetit në rajon dhe më gjerë.
Teksa tha se pas sesionit të Grupit të Kontaktit u takuan edhe me personalitete nga vendet partnere.
“Pas sesionit të Grupit të Kontaktit gjithashtu takuam Sekretarin e Përgjithshëm të NATO-s, Jens Stoltenberg, Ministrin e Mbrojtjes të Ukrainës, Oleksii Reznikov, Ministrinë e Mbrojtjes së Gjermanisë, Boris Pistorius, Ndihmës Sekretaren e Mbrojtjes së ShBA-ve, Laura Kuper, Ministrin e Mbrojtes të Suedisë, Pål Jonson, Ministren e Mbrojtjes të Latvisë, Ināra Mūrniece, Ministrin e Mbrojtës së Kroacisë, Josip Buljević, Ministren e Mbrojtjes së Maqedonisë së Veriut, Slavjanka Petrovska, Komandantin e Komandës Evropiane të ShBA-së, gjeneral Christopher Cavoli, Shefin e Shtabit të Forcave të Armatosura të Shqipërisë, Gjeneral Kingjin, si dhe personalitete tjera nga vendet partnere. Republika e Kosovës mbetet e përkushtuar të ofroj gjithë mbështetjen në ruajtjen e paqes dhe stabilitetit në rajon dhe më gjerë”, tha ai./teve1.info./
