Një vrasje e trefishtë nga i dyshuari Mefail Shkodra, tronditi Gjilanin të dielën.
Për këtë rast, Inspektoriati Policor suspendoi katër zyrtarë policorë, nën dyshimin për keqpërdorim të detyrës zyrtare.
Policët dyshohet se shoqëroheshin me Shkodrën, i cili tash ndodhet në arrati.
Por, kjo nuk është hera e vetme që Mefail Shkodra mbante kontakte me zyrtarë policorë të Gjilanit.
Në një dokument që ka siguruar Tëvë1, dy policë ishin hetuar pikërisht për këtë çështje, nga Drejtoria e Hetimeve të Brendshme brenda Policisë së Kosovës.
Në dokument theksohet se ankuesi e ka parë një rreshter policor me inicialet D.O, emër i njohur për redaksinë, bashkë me vëllanë e tij, duke qëndruar në kafenenë “2000”, bashkë me Mefail Shkodrën.
Pikërisht në kafenenë “2000”, të dielën ndodhi vrasja e trefishtë, dhe i dyshuar kryesor është Mefail Shkodra.
“Gjithashtu ankuesi deklaron se rreshter D.O ishte mbikëqyrës në Njësinë e Hetimeve në Stacionit Policor në Gjilan, dhe rastet e paraqitura nga ai aty ndaj personit Shkodra, dyshon se i njëjti kishte ndikuar në vendimmarrje. Gjatë intervistës ankuesi paraqet shqetësimin edhe lidhur me sjelljen e zyrtarit policor H.P. kur kishte paraqitur rastin se në llogarinë e hapur në Facebook në emrin Fatime Berisha qëndron Mefail Shkodra”, thuhet ne dokumentin që ka siguruar Tëvë1.
Përkundër këtyre pretendimeve të ankuesit, i cili i ka paraqitur si prova edhe tri fotografi, hetuesit e brendshëm mbyllën hetimet kundër këtyre zyrtarëve policor.
Ata i besuan një deklarate të rreshterit D.O, i cili tha se me Mefail Shkodrën u takua vetëm për çështje profesionale.
D.O dha disa detaje nga takimi.
“Pasi ishin takuar afër kafiterisë Palace, kishin shkuar në kafiterinë prapa ndërtesës së Administratës dhe ja kishte tërhequr vërejtjen Mefailit në lidhje me mesazhin e tij në rrjetin Facebook ku i kishte thënë se është pjesëtar i Policisë dhe nëse ka informacione për vëllain e tij se merret me veprimtari të kundërligjshme e arreston”, thuhet tutje ne dokument.
Po ashtu, në dokument theksohet se rreshteri kishte deklaruar se ky ishte takimi i vetëm me të dyshuarin për fajde.
“Rreshter D.O deklaron se ky ishte takimi i vetëm që ishte takuar edhe pse kanë lidhje miqësore me vëllaun e tij dhe gjatë këtij takimi kishte qenë edhe zyrtari policor V.D i mohon pretendimet e ankuesit lidhur me ndikimin në rastet e tij duke pasur parasysh se këto raste ishin trajtuar nga ekipe tjera dhe nuk kishin qenë nën menaxhimin e tij”, thuhet në fund të dokumentit.
Drejtoria e Hetimeve të Brendshme, gjithashtu ka hedhur poshtë edhe ankesat ndaj zyrtarit tjetër policor me inicialet H.P, se e kishte tejkaluar pozitën e tij derisa po trajtonte një rast.
Gjithnjë sipas këtij vendimi, bazuar në veprimet hetimore, shkresave të lëndës dhe analizimit të tyre thuhet se këta zyrtarë nuk kanë bërë ndonjë shkelje disiplinore.
Si përfundim, është theksuar se nuk është dëshmuar se këta zyrtarë policorë mund të kenë kryer ndonjë veprim jo të duhur gjatë kryerjes së detyrës apo jashtë saj, e që do të vërtetohej me ndonjë fakt apo provë.
