(24sata.hr) – Ekziston një vijë e hollë mes yjeve dhe fundit, ndërsa Dinamo e Zagrebit e ndjeu këtë në lëkurën e tij. Dy muaj më parë, Dinamo ishte vetëm disa minuta larg plejofit të Ligës së Kampionëve, por ndodhi një disfatë tragjike ndaj AEK-ut dhe që atëherë gjithçka është shembur. Dinamo ra edhe nga Liga e Evropës dhe për herë të parë në histori të klubit, zbriti në rangun e tretë të garave të UEFA-s, Ligën e Konferencës.
Gjithçka ishte e mrekullueshme dhe fantastike pas fitores ndaj Astanës në hapje të kësaj gare, por Dinamo pësoi të enjten mbrëma një nga humbjet më të rënda evropiane. Humbi nga Ballkani (2:0) në xhiron e dytë të Grupit C të Ligës së Konferencës. Ideator i fitores së bujshme të Ballkanit është trajneri shqiptar Ilir Daja (56), i cili pa dyshim është bërë specialist për ta mposhtur kampionin e Kroacisë.
Në pesë vjetët e fundit, Dinamo ka ndërtuar reputacionin e një klubi serioz evropian. Gjatë asaj kohe, Dinamo dimëroi edhe tri herë në Ligën e Evropës, ndërsa dy vjet më parë arriti deri në çerekfinale të kësaj gare. Në dhjetë vjetët e fundit, Dinamo humbi vetëm një herë fazën e grupeve të garave evropiane. Ishte viti 2017 kur Skënderbeu i eliminoi nga plejofi i Ligës së Evropës dhe pikërisht Ilir Daja ishte trajner i klubit nga Shqipëria.
Në ndeshjen e parë në Maksimir ishte 1:1, shënuesi i vetëm për mikpritësit ishte Angelo Henriquez dhe një javë më vonë Skënderbeu barazoi 0:0 në shtëpi dhe dëboi Dinamon nga Evropa. Ishte sezoni i parë pas 11 vjetësh, në të cilin Dinamo nuk luajti në fazën e grupeve. Klubi shqiptar më pas përfundoi i fundit në grup me pesë pikë të mbledhura. Ishte një nga fitoret më të mëdha në karrierën e trajnerit Ilir Daja deri më sot. Ai drejtoi vetëm klube kosovare dhe shqiptare, madje tri herë fitoi titullin e kampionit të Shqipërisë me tri klube të ndryshme, me Elbasanin, Dinamon e Tiranës dhe Skënderbeun. Ai ka edhe dy tituj në Kosovë me skuadrën e Ballkanit. Atëbotë, trajner i “bluve” ishte Mario Cvitanoviq, ndërsa luanin lojtarët si Livakoviç, Moro, Sigali, Soudani, Olmo e Fernandes dhe kjo eksperiencë e hidhur vetëm se e forcoi Dinamon.
Sezonin e ardhshëm, Dinamo arriti deri në 1/8 e finales të Ligës së Evropës, ku u eliminua nga Benfica. Kush e di, ndoshta kjo disfatë e hidhur nga Ballkani në Prishtinë do t’i sjellë diçka të mirë Dinamos, sado negative të duket gjithçka për momentin. Dështimi është shpesh rruga drejt suksesit për ekipin më të madh dhe më të suksesshëm të Kroacisë.
