Nga sot e deri në një vendim të radhës, në katër komunat veriore do të qëndrojnë vetëm 50% e policëve të Kosovës që janë të angazhuar në ruajtjen e objekteve të komunave në atë zonë të shtetit.
Zvogëlimin për 25% të pranisë policore, kryeministri Kurti e ka cilësuar edhe si zbatim të marrëveshjes së Bratisllavës.
“Nga sot filloi zvogëlimi edhe për 25% të tjera i pranisë së policisë së Kosovës në tri ndërtesat e komunave në veri të vendit tonë. Kjo vjen pas vlerësimit të gjendjes së sigurisë nga mbledhja që pardje mbajtën drejtues të Policisë së Kosovës me EULEX-in dhe KFOR-in. Ne po zbatojmë me përgjegjësi dhe seriozitet, sinqeritet dhe kujdes, marrëveshjen e Bratisllavës nga 10 korriku 2023 në funksion të kërkesave të BE-së nga 3 qershori 2023 për de-eskalim”, ka thënë Kurti.
Tensionet e fundit në veri, kanë shtyrë Bashkimin Evropian të shqiptojë masa ndaj Kosovës. E për këto masa, nga zyra e zëvendëskryeministrit Besnik Bislimi, për tëvë1 kanë thënë se BE, tani duhet t’i heq ato.
“Ne vazhdimësi e kemi theksuar qe masat ndaj Kosovës kane qene te padrejta dhe qe tashme duhen hequr. Qeveria e Republikës se Kosovës ka qene dhe mbetet e përkushtuar për de-eskalim, te cilën e dëshmoi dhe marrëveshja ne Bratisllave dhe implementimi ne hapat e saj nga ana e Kosovës”, thuhet nga zyra e zëvendëskryeministrit.
Analistja Arta Tahiri thotë se deri të hënën Bashkimi Evropian do të duhej të dilte me njoftim se janë larguar masat për Kosovën.
Televizioni ka provuar të marrë edhe një përgjigje nga Bashkimi Evropian, në lidhje me atë nëse këto masa do të hiqen, por që deri më tani nuk kemi marrë ndonjë përgjigje.
