Me një minutë heshtje nisi seanca e jashtëzakonshme.
Kjo në nderim të të gjithë të vrarëve në gjenocidin që kreu Serbia 29 vjet më parë në Bosnjë e Hercegovinë.
Në këtë seancë u votua edhe deklarata e OKB-së e cila ka për qëllim përkujtimin e kësaj masakre.
E pas miratimin të deklaratës, deputetët vazhduan seancën plenare me 32 pika në rendin e ditës.
Opozita paraprakisht i kërkoi mazhorancës përmes një rezolute, të tërhiqen nga votimi i tri projektligjeve, të cilat sipas opozitarëve, janë kundër-Kushtetues.
“ Ta obligojmë qeverinë e Republikës së Kosovës, për tërheqjen e tri projektligjeve të cilat ne vlerësojmë që janë në kundërshtim me frymën Kushtetuese. Pra procedimi sot për Këshillin Prokurial të Kosovës, procedimi për Këshillin e Pavarur të Medieve, dhe procedimi i ligjit për Shërbyesit civil”, tha Abelard Tahiri nga PDK.
Kërkesë për tërheqjen e këtyre ligjeve pati edhe LDK-ja.
“Këto tri ligje kanë përmbajtje të theksuar kundër Kushtetuese dhe si të tilla duhet të tërhiqen nga rendi i ditës dhe kuvendi të mos i shqyrtoi”, tha Arben Gashi nga LDK.
Kurse nga AAK vlerësuan se miratimi i këtyre ligjeve pa synim kapjen e shtetit përmes ligjit.
“ Kjo mundet me qenë një ndër seancat më të dëmshme të kësaj legjislature për arsyeje se kjo seancë siç po shihet, ka mundësi ti miratoi tri ligje të cilat në esencë e kanë veç një synim, kapjen e shtetit në mënyrë ligjore, kapjen e institucioneve”, tha Besnik Tahiri.
Por nga partia në pushtet, Adnan Rrustemi tha se këto tri projektligje, kanë kaluar në filtra procedurale për çka, opozita nuk ka dhënë kontribut.
“ Duhet ta themi një gjë të tri projektligjet kanë ndjekur secilën procedurë, në kuptimin e dëgjimeve publike, të palëve të interesit, dhe secili deputet ka pasë mundësi me bë propozime, vërejtje e sugjerime, është e pashembullt se si deputetët e opozitës nuk e japin asnjë kontribut”, është shprehur Rrustemi
Pasi opozita e lëshoi sallën, deputetët në lexim të dytë miratuan dy ligjet e kundërshtuara edhe nga faktori ndërkombëtar, atë për Komisionin e Pavarur të Mediave dhe Këshillit Prokurorial, ndërsa ai për Zyrtarët Publik, u shtye për një seancë tjetër, në mungesë kuorumi.
Gjatë kësaj seance, deputetët miratuan edhe projektligje tjera, Ligji për të Huajt, statutin e ri të UP-së, ligji për Rininë, ligji për Sportin me 60 amendamente, dhe Ligji për Rininë.
Punimet në sallën alternative do të vazhdojnë deri sa të përfundon ristrukturimi i sallës së Kuvendit me pajisje elektrike nga ku do të votojnë deputetët.
