Më shumë se 10,000 palestinezë ndodhen në paraburgim izraelit, përfshirë rreth 3,600 që mbahen pa akuza ose pa u gjykuar, njoftoi të martën një grup për të drejtat e të burgosurve.
Zyra e Medias për të Burgosurit raportoi se ushtria izraelite ka arrestuar mbi 17,000 palestinezë që nga tetori i vitit 2023, përfshirë 545 gra dhe 1,360 fëmijë.
Sipas deklaratës së zyrës, aktualisht janë 10,100 palestinezë në paraburgim izraelit, ndërsa 3,600 prej tyre mbahen pa gjyq ose akuza, në kuadër të politikës izraelite të paraburgimit administrativ.
Muajin e kaluar, autoritetet izraelite lëshuan urdhra për paraburgim administrativ ndaj 755 palestinezëve, përfshirë pesë gra, raporton Anadoly.
Paraburgimi administrativ është një politikë që u mundëson autoriteteve izraelite të mbajnë të burgosur palestinezë për kohë të pacaktuar pa u ngritur akuza ose pa u zhvilluar gjyq.
Që nga fillimi i luftës në tetor të vitit 2023 janë vrarë mbi 54,400 persona, shumica prej tyre gra dhe fëmijë.
Ndërkohë, në Bregun Perëndimor të pushtuar, të paktën 973 palestinezë janë vrarë dhe mbi 7,000 janë plagosur nga sulmet e ushtrisë izraelite dhe kolonëve të paligjshëm gjatë të njëjtës periudhë.
