Ministria e Ekonomisë ka propozuar shtim të blloktarifave për konsumin mbi 800 kilovatë të energjisë elektrikë në muaj.
Sipas një komunikate të kësaj ministrie, Qeveria konsideron që duhet të ketë shpërndarje të barrës së rritjes së çmimit brenda grupeve të konsumatorëve.
“Në këtë drejtim, konsiderojmë se është e drejtë që rritja të mos prekë amvisëritë që konsumojnë më pak se 800 kWh dhe të shtohet numri i brezeve (blloqeve) të konsumit për konsumin mbi 800 kWh”, thuhet në njoftim.
Për këtë propozim, Ministria e Ekonomisë ka thënë ka marrë për bazë disa trendë.
“Të dhënat e disagreguara tregojnë se një pjesë e konsiderueshme e konsumit gjatë dimrit vjen nga një përqindje e vogël e konsumatorëve. Për shembull, në nëntor 2024, 12% e amvisërive (me konsum mbi 1000 kWh) kanë konsumuar 39% të energjisë elektrike të gjithëmbarshme; ose, në janar 2025, 9% e konsumatorëve (me konsum mbi 2000 kWh) kanë konsumuar 29% të energjisë së gjithëmbarshme elektrike, dhe më shumë se të gjithë konsumatorët që kanë shpenzuar nën 800 kWh së bashku (sipas të dhënave nga furnizuesi)”, thuhet në një nga trendët e përmendur nga ME-ja.
Sipas Ministrisë, është rritur dukshëm shpenzimi i energjisë nga bizneset. Ministria ka thënë se modernizimi i sistemit energjetik merr kohë, po “ai siguron përfitime afatgjata për ekonominë dhe shëndetin tonë dhe të brezit të ardhshëm”.
“Ndërkohë, kufizimi i nevojës për import të energjisë elektrike përmes rritjes së efiçiencës dhe uljes së konsumit janë thelbësore që këtë periudhë vendi ta kalojë me sa më pak ndikim”, thuhet në njoftim.
