Këto lule, u mbjellën për të gjithë viktimat e dhunës seksuale në Kosovë.
Kjo u bë më 19 Qershor, shënohet Dita Ndërkombëtare për Eliminimin e Dhunës Seksuale në Konflikt.
Lule vendosën kryeministri në detyrë, Albin Kurti dhe kabineti i tij.
Mirëpo Kurti, nuk e tha asnjë fjalë për këtë çështje.
Pas tij, fjalën e mori ministrja e drejtësisë në detyrë, Albulena Haxhiu.
Ajo përmendi se në çfarë forma i kanë mbështetur si Qeveri të mbijetuarit e dhunës seksuale në Kosovë.
“Është një krim i rëndë, një mjet lufte që Serbia e ka përdorur gjatë luftës. Në këtë drejtim, sipas raporteve vendore dhe ndërkombëtare, është konsideruar që rreth 20 mijë persona janë dhunuar seksualisht gjatë luftës në Kosovë. Si qeveri që nga fillimi i mandatit kemi ndërmarrë veprime konkrete për të adresuar krimet e luftës. Qeveria e ka themeluar Institutin për krimet e luftës, ku do të dokumentohen dhe identifikohen të gjitha krimet që kanë ndodhur në Kosovë. Kemi mundësuar votimin e strategjisë për drejtësi tranzicionale”, ka thënë Haxhiu.
Nga Agjencia për Barazi Gjinore kanë treguar se mbi 1 mijë e 700 personave tashmë i është njohur statusi i të mbijetuarve.
“Shënojmë së bashku të gjithë qytetarët e Kosovës Ditën Ndërkombëtare të mbijetuarve të dhunës seksuale gjatë luftës. Kosova jep një kontribut të veçantë. Kjo është një ditë kur respektojmë memorien kolektive për atë çka ka ndodhur në Kosovë. Mbi 1 mijë e 700 personave tashmë i është njohur statusi i të mbijetuarve. Ngrit zërin për të gjitha ato dhunime seksuale që aktualisht janë duke u përdorur si mjet lufte në të gjitha vatrat e luftës në mbarë botën. Bëjmë thirrje që angazhimi i të gjithë liderëve botërorë për të parandaluar dhunimet seksuale si mjet lufte”, ka thënë Gusia.
E kryetarja e komisionit qeveritar për njohjen dhe verifikimin e statusit të viktimave të dhunës seksuale gjatë luftës, Leonora Selmani tregon se ka ende afat për aplikim të njohjes së këtij statusi.
Pas Qeverisë, në parkun “Heroinat” erdhën edhe nga Qendra Kosovare për Rehabilitimin e të Mbijetuarve të Torturës.
Të pranishëm ishin edhe të mbijetuarit e dhunës seksuale, Shyhrete Tahiri Sylejmani dhe Ramadan Nishori.
Drejtoresha e QKRMT-së, Feride Rushiti kërkon që të mos ketë afat për njohjen e statusit për viktimat e dhunës seksuale.
Në Ditën Ndërkombëtare për Parandalimin e Dhunës Seksuale në Konflikt, presidentja e Kosovës, Vjosa Osmani ka thënë se të mbijetuarit u bënë simbol i forcës përballë krimeve çnjerëzore të regjimit gjenocidal të Millosheviqit.
