Qindra qytetarë nga Kosova dhe diaspora janë mbledhur në sheshin “Laan van Reagan en Gorbatsjov” në Hagë, në mbështetje të ish-udhëheqësve të UÇK-së, të akuzuar për krime lufte dhe krime kundër njerëzimit.
Sheshi ndodhet rreth 3 kilometra larg Gjykatës Speciale të Kosovës ku më 3 prill ka nisur gjykimi ndaj Hashim Thaçit, Kadri Veselit, Jakup Krasniqit dhe Rexhep Selimit.
Në mesin e protestuesve ka edhe pjesëtarë të diasporës nga Gjermania, Kroacia e Zvicra.
Në procesin gjyqësor, katër ish-krerët e UÇK-së janë deklaruar të pafajshëm.
Prokuroria e Specializuar ka nisur deklaratën hyrëse, ku do të ketë pesë orë kohë për të mbrojtur rastin, raporton teve1.info.
I pyetur se a është e qartë akuza e ndryshuar, ish-presidenti i Kosovës, Hashim Thaçi, është deklaruar se ka kuptuar aktakuzën dhe se është plotësisht i pafajshëm.
“E kuptoj aktakuzën dhe jam plotësisht i pafajshëm”, tha Thaçi.
Njëjtë ka vepruar edhe ish-kryeparlamentari, Kadri Veseli, i cili ka thënë se është tërësisht i pafajshëm.
“E shprehi pakënaqësinë time për një vonesë të tillë dyvjeçare e gjysmë, megjithatë iu falënderoj, tërësisht i pafajshëm”, është shprehur Veseli.
Sikurse Thaçi e Veseli, edhe Jakup Krasniqi, është deklaruar i pafajshëm duke thënë se nuk asnjë lidhje me pikat e aktakuzës.
“S’kam asnjë lidhje me pikat që i lexoi prokuroria para pak kohësh. Akuzën e kuptoj, por nuk pajtoj pasi nuk mbaj asnjë përgjegjësi me atë që e flet akuza. Jam plotësisht i pafajshëm”, tha Krasniqi.
Edhe ish-udhëheqësi i katërt, Rexhep Selimi ka thënë është i pafajshëm në të gjitha pikat e aktakuzës.
“Jam i pafajshëm nga të gjitha pikat në aktakuzë”, ka thënë Selimi. /teve1.info/
