Po bënin edhe përgatitjet e fundit. Pas vendosjes së kapelave dhe jelekëve të punës, rendi i erdhi hedhjes së themelit.
Kësisoj, këtë të martë në qytetin e Gjilanit filluan punimet për ndërtimin e Shkollës së Mesme të Mjekësisë.
Kryetari i Komunës, Alban Hyseni tha se ky projekt nuk do t’i shërbejë vetëm Gjilanit, por edhe Anamoravës, Preshevës e Bujanocit.
“Në këtë shkollë që po e vëmë gurthemelin sot nuk është vetëm mësimi që do të jepet aty, është ndërtimi i brezave të së ardhmes. Kontribut ky për ne si Komunë e për organizatën Islamic Relief Kosova nuk matet dot as me vlerë e as me metër katror ndërtim, por shumë më shumë matet nesër e në të ardhmen me jetët që do të shpëtohen nga kuadri që krijohet në këtë shkollë”, ka thënë Hyseni.
Aty disa fjalë i pati edhe zëvendësministri në detyrë i Ministrisë së Arsimit, Arsim Ademi.
“Unë i uroj të gjithë të pranishmit në veçanti drejtorin profesorët e shkollës së mjekësisë, e në mënyrë të veçantë nxënësit e kësaj shkolle, këta që janë këtu e ata që do të vijnë edhe më pastaj”, ka thënë Ademi.
I lumtur për këtë nismë ishte edhe drejtori gjeneral i organizatës Islamic Relief.
“Ndjehem i privilegjuar të jem këtu në inaugurimin e kësaj shkolle të mjekësisë. Kam qenë edhe vitin e kaluar në Kosovë me disa projekte, por sot është një moment krenarie për mua për organizatën Islamic Relief, por dhe për ju që po vihet themeli i kësaj shkolle”, është shprehur drejtori gjeneral i organizatës Islamic Relief, Vassem Ahmad.
Këtë ndërtim të shkollës si projekt të rëndësishëm e quajti edhe drejtori i Islamic Relief për Kosovën dhe Shqipërinë.
“Për ne është projekti i rëndësishëm si për Gjilanin si për rajonin e Gjilanit. E falënderojmë organizatën internacionale islamike për fondacionin të cilën veç se e kanë ndarë”, ka thënë drejtori i Islamic Relief për Kosovën dhe Shqipërinë, Mohammed Soliman.
Ky projekt financohet me fondet nga organizata në Kuvajt në bashkëpunim me Islamic Relief Kosova.
