Dita e mërkurë nuk nisi mirë për Arben Aliun, i cili po bartë udhëtarë nga Prishtinë në Fushë Kosovë.
Kjo pasi rrugën ia ndërprenë Policia e Kosovës, së bashku me inspektorët e Komunës së Prishtinës.
Ai u detyrua që të zbresë udhëtarët dhe u dënua me gjobë prej 100 euro për punën ilegale të cilën ishte duke e ushtruar.
Ani pse nuk ka leje për të punuar si taksist, Aliu thotë se nuk ka zgjidhje tjetër.
“Edhe na nuk jemi duke punuar askund, dika po duhet me ja mbajt. Që 12 vjet punoj qashtu taksist ilegale, se nuk kam mundësi ka me ia mbajtë, ku me shku, çka me bo”, tha taksisti Arben Aliu.
Madje as kjo gjobë thotë se nuk do ta ndal ta ushtrojë këtë punë.
“Më së paku duhet me punu dy –tri ditë për më la këtë dënim mse 100 euro me kanë dënuar. Vallah nuk e di se nuk kam ka me ja mbajt, apet më duhet me dal”, tha ai.
Kurse taksisti Ramadan Sogojeva kërkon që t’i bëhet një zgjidhje.
“Nëse dojnë këta me na hjekë, le të na mbledhin taksistat vijna na taksistat na shtin punë në KEK edhe e lëjmë edhe ne, përndryshe nuk e lejmë se duhet me hangër edhe me pi edhe ne, kemi fëmijë e kemi obligime, faturat”, tha ai.
Këtu doli edhe drejtori i shërbimeve publike, Bekim Brestovci i cili dha detaje rreth këtij aksioni.
“Nuk është ndonjë aksion i veçantë. Është një punë që Inspektorati i Prishtinës e bën në përditshmëri. Kemi punuar javën e kaluar dhe kemi vazhduar edhe gjatë ditëve të kësaj jave të bëjmë përndjekjen e taksive ilegale te Xhamia e Llapit. Atje kemi një frekuentim të madh të veturave të cilat në mënyrë ilegale transportojnë qytetarë nga Podujeva. Tani e kemi fokusuar vëmendjen edhe në këtë pikë që e quajmë të Lakërishtës. Vërehet që ka lëvizje të madhe të veturave që transportojnë qytetarë për Mitrovicë, Drenas, Fushë Kosovë e Obiliq. Policia është duke asistuar që këtë dukuri ta ç’rrënjosim”, tha Brestovci.
Javën e kaluar, Komuna e Prishtinës ka shqiptuar mbi 42 gjoba ndaj taksistëve ilegal, e ky aksion pritet të vazhdojë edhe në ditët në vazhdim.
