Autore:Jona Kelmendi
Këtë të premte në sheshin “Zahir Pajaziti” në Prishtinë, fëmijë nga shkolla të ndryshme janë mbledhur për të shënuar 26 vjetorin e themelimit të Policisë së Kosovës.
Të veshur me bluza dhe kapele me logon e policisë, ata patën mundësinë të njihen nga afër me njësitë speciale, qentë e trajnuar dhe pajisjet e policisë.
Fëmijët shprehën urime dhe përshtypjet e tyre për këtë ditë.
“I uroj Policisë së Kosovës ditën e policëve dhe uroj të kenë shëndet”, tha nxënësja Jona Baliu.
“Për mu aktiviteti sot është kon vendi ma i miri që e kemi vizitu me klasë dhe është kon shumë mirë”, tha Zgjim Beka.
“Mu sot m’ka pëlqy për qentë se çfarë aktivitete kanë bo edhe se si na kanë shoqëruar neve” shprehet nxënësja Madia Obrazhda.
Edhe mësuesit vlerësuan aktivitetet e prezantuara.
“Po e shoh shumë madhështor pasi që janë pjesëmarrës edhe fëmijët edhe e shohin prej së afërmi çka bën Policia jonë e mrekullueshme. Tërë javën jemi përgatitë për këtë ditë, entuziazmi i tyre ka qenë i jashtëzakonshëm, janë përgatit në maximum”, tha Suzana Xhemajli – mësuese në shkollën Qamil Batalli.
Derisa theksuan rëndësinë e tyre për edukimin dhe afërsinë e fëmijëve me Policinë.
“Është një ditë e veçantë për Kosovën, për fëmijët e Kosovës, për Policinë e Kosovës për arsye se po shënojmë një përvjetor të rëndësishëm ku Policia e Kosovës mundohet çdo herë me kry punën e vet karshi përgjegjësisë që ka ndaj qytetarëve për sigurinë e tyre në një ambient të sigurt dhe të përshtatshëm”, tha Florim Shabani – mësimdhënës në shkollën “Emin Duraku”.
E në anën tjetër majori i Policisë, Ramadan Ahmeti tha se këto aktivitete janë organizuar për të afruar qytetarët, veçanërisht fëmijët me punën e Policisë.
“Këtu kemi ekspozu si drejtori kemi ftu njësi të ndryshme të Policisë për të tregu se si ata operojnë në baza ditore në orarin e tyre të punës, por njëkohësisht duke mendu me qenë interesant edhe për fëmijët për të kuptu se cilat janë specifikat edhe punët siç patëm mundësinë me pa njësitë e qenëve”, tha ai.
Pjesë e aktivitetit ishte edhe ministri në detyrë, Xhelal Sveçla i cili tha se zyrtarët policorë angazhohen çdo ditë e pa kursim për sigurinë e fëmijëve dhe të gjithë qytetarëve të vendit.
Aktivitete të tilla për 26 vjetorin e themelimit Policia ka zhvilluar edhe në disa komuna të tjera të Kosovës.
