Shtrenjtimi i produkteve të konsumit ka bërë që edhe në Kosovë të bëhet thirrje për bojkot.
E në rast që nuk ndërmerren masa, më datë 10 shkurt, marketet e mëdha pritet të mbesin pa konsumatorë.
Kjo thirrje është duke u bërë tash e disa ditë në grupin e formuar në facebook “Bojkoto Produktet”.
E një gjë të tillë janë duke e përkrahur edhe qytetarët.
“Më përpara me 150 euro kemi dal a tash me 300-400 nuk po ia dalim. Po duhet masi Kroacia e vendet tjera i kanë bërë, duhet të bojkotohet edhe tek ne në Kosovë”, tha qytetari Hiset Hajdini.
“Po duhet me ndërmarr masa por nuk po ndërmerr masa, kush me ndërmarrë masa tregtarët a?, Jo!Qeveria, tregu i lirë është, e shet sa don, nuk mundet me përzi askush, tatimin ja paguan edhe u kry puna”, tha qytetari tjetër, Man Bahtiri.
“Po patjetër, edhe shumë shpejt”, tha Ragip Gashi.
Kryetari i Shoqatës së konsumatorëve thotë se fushata zgjedhore ka ndikuar që të mos filloj më herët kjo iniciativë.
“Nuk kemi dashur ta prishim klimën zgjedhore prandaj nuk kemi dashur që deri me 9 të bëjmë aktivizimin tonë, e kemi lënë pas zgjedhjeve edhe me qëllim t’i japim partive politike, edhe atyre që janë aktualisht në qeveri edhe atyre që do të jenë në të ardhmen që të reflektojnë”, tha Selatin Kaçaniku.
Shteti ka shumë mekanizma që mundet dhe duhet të ndikojë, jo ato janë të kundërligjshme që janë pllafonat dhe dyshimet por ne kemi ligjet, i kemi ligjin e konkurrencës së lirë, ligjin për ushqimet dhe mbi të gjitha e kemi ligjin për mbrojtjen e konsumatorit, por që për fat te keq pak zbatohet.
Por sipas ekspertit të ekonomisë, Mustafë Kadrijaj, ky veprim nuk është duke u bërë në kohën e duhur.
“Kjo kërkesë e qytetarëve nuk është në kohën e duhur për shkak që jemi para zgjedhjeve edhe nëse e ngrenë zonin ndonjë subjekt politik e shfrytëzon për poena poltik, po jo diçka në interes të qytetarëve. Prandaj konsideroj se nuk është në kohë të duhur ky lloj bojkoti”, tha Kadrijaj.
Protesta kundër rritjes së çmimeve filloi së pari në Kroaci, ku qytetarët vendosën të bojkotojnë supermarketet, e më pas kjo iniciativë u përhap në Serbi, Maqedoninë e Veriut, Mal të Zi, Bosnje dhe Slloveni.
