Njëra nga nismat më të rëndësishme Qeverisë Kurti III, është Byroja Shtetërore për Verifikimin dhe Konfiskimin e Pasurisë së Pajustifikueshme.
Ky projektligj që nisi nga Qeveria Kurti II, e u rrëzua nga Gjykata Kushtetuese, siç duket është prioritet edhe i qeverisë së re.
Për rreth një muaj, ajo synon ta miratojë këtë projektligj.
Ky projektligj, është përcaktuar që të përfundojë më 30 mars 2026.
Mirëpo, kjo po shihet si vështirë e realizueshme.
“Marrë për bazë se duhen të respektohen të gjitha procedurat e hartimit të këtij projektligji ose e propozimit të këtij projektligji, që përfshin shqyrtimin dhe miratimin në Qeveri, por që paraprakisht do duhej të kishte një proces të konsultimit dhe të trajtimit të këtij projektligji në tërësi nga ana e një grupi punues që duhet të formohet në këtë rast nga ana e Ministrisë së Drejtësisë. Besoj që procedurat nëse ndjeken sipas afatit dhe sipas rregullores së punës së Kuvendit dhe sipas ligjeve përkatëse, unë e shoh të pamundur që brenda këtij muaji të konsolidohet në tërësi ky draft”, thotw Vullnet Bugaqku nga KDI
Përpos Byrosë, Minisria e Drejtësisë ka planifikuar në bazë të agjendës legjislative edhe 22 projektligje të tjera, në kuadër të reformës në drejtësi.
Pjesa më e madhe e tyre, 14 janë paraparë për në muajt shtator – dhjetor të vitit 2026.
Ky plan kohor, vlerësohet se përmban rrezikun që të përsëriten situatat kur projektligjet votohen me procedura të përshpejtuara, për të përfunduar më pas në filtrin e Gjykatës Kushtetuese.
“Meqë e kemi pasë një situatë nga legjislatura e kaluar që një pjesë e nismave kanë mbetur për pjesën e dytë dhe të fundit të vitit, dhe kanë kaluar me një procedurë të përshpejtuar dhe me mungesë debati të mirëfilltë në Kuvend, dhe kanë përfunduar në Gjykatë Kushtetuese si të pavlefshme, normalisht që rreziku do të ekzistojë edhe tash, kur ne e shohim se nga ky program legjislativ e kemi pjesën e konsiderueshme të nismave për pjesën e dytë të vitit’, shprehet Blerina Istrefi nga GLPS.
Pjesë e planit legjislativ për Ministrinë e Drejtësisë për periudhën 2026-2028, janë projektligjet që konsiderohen si kyçe për reforma në drejtësi, si projektligji për Këshillin Prokurorial; projektligji për Gjykatat; Projektligji për Përgjegjësitë Disiplinore të Gjyqtarëve dhe Prokurorëve, projektligji për Këshillin Gjyqësor të Kosovës; projektligji për Akademinë e Drejtësisë; projektligji për Rekrutimin, Vlerësimin e Performancës, Kontrollin e Integritetit dhe Statusin e Gjyqtarëve dhe Prokurorëve.
