Mbyllja e institucioneve paralele serbe në katër komunat veriore, bëri që faktori ndërkombëtarë të reagojë përsëri.
Kjo pasi një javë më parë, Policia e Kosovës mbylli katër Qendra për Punë Sociale në komunat veriore, pasi që punonjës të këtyre institucioneve, më 9 shkurt thirrën qytetarët serbë për të votuar Listën Serbe.
Nga ambasada amerikane thanë se veprimet e tilla duhet të merren në koordinim me SHBA-të dhe Bashkimin Evropian.
Por, njohësi i sigurisë Avni Islami, thotë se pavarësisht këtyre rekomandimeve, veprimet e Policisë janë legjitime.
“ Pavarësisht disa rekomandimeve nga ana e bashkësisë ndërkombëtare që të mos ndërmerren veprime të tilla që kanë marrë institucionet e Republikës së Kosovës, mirëpo gjendja faktike në terren tregon se seriozisht institucionet e Republikës së Kosovës, kanë pas të drejtë kur kanë marrë veprime të tilla, dhe tashmë janë pajtuar edhe vet qytetarët serbë”, vlerëson Islami.
Ai e sheh pozitive edhe bashkëpunimin e qytetarëve të komunitetit serbë me Policinë e Kosovës.
“ Bashkëpunim mes qytetarëve dhe organizatave punuese serbe, pra dallim race, feje dhe nacionaliteti të gjithë janë duke bashkëpunuar me Policinë e Kosovës, dhe se e njëjta është në shërbim të qytetarëve dhe vendit”, thotw Islami
E kryesuesi i kuvendit komunal të Mitrovicës së Veriut, Nexhat Ugljanin, tha për Tëvë1 se komuna po kryen funksionin e saj sipas ligjeve të Republikës së Kosovës.
“Ne po funksionojmë si kuvend, i kemi sjellë vendimet si ekzekutivi dhe kryetari po i kryen detyrat obligative që në mënyrë legjitime dhe legjislative të kryhen obligimet ndaj qytetarëve sepse këtu siç e dini ka qenë një lloj anarkie. Ne duhet t’i mësojmë qytetarët se është procesi demokratik edhe legjitim sipas ligjeve duhet të funksionoi komuna”, thotw ai.
Të gjitha materialet në këto katër qendra ilegale janë konfiskuar, derisa lidhur me rastin janë arrestuar tri gra.
