Për shkak të reshjeve të dendura të borës është bllokuar rruga nga Brezovica në drejtim të Qendrës së Skijimit.
Për teve1.info, zëdhënësi i Policisë për rajonin e Ferizajt, Kanun Veseli, ka bërë të ditur se nuk ka kushte për skijim, deri në pastrimin e rrugëve nga kompanitë përkatëse.
Veseli tha se në vendin e ngjarjes kanë dalë njësitë rajonale të komunikacionit.
“Ju njoftojmë se për shkak të reshjeve të dendura të borës që ka mbuluar atë zonë, është vështirësuar qarkullimimi i automjeteve dhe në ora 10:15 është mbyllur tërësisht për qarkullim rruga nga Brezovica në drejtim të Qendrës së Skijimit, deri në pastrimin e rrugës nga kompania për pastrimin e rrugëve. Policia e stacionit të Shtërpcës dhe Njësia Rajonale e Komunikacionit është në Brezovicë dhe po orienton komunikacionin. Nga zyrtarët e Qendrës së Skijimit jemi njoftuar gjithashtu se sot, nuk ka kushte për skijim”, tha Veseli.
Ndërkohë, është bërë e ditur se edhe parkingu është i bllokuar.
“Pas reshjeve të mëdha të borës në Qendrën e Skijimit në Brezovicë është shumë keq. Ka 1 metër borë, vetëm një korsi e rrugës është pastruar, parkingu është i bllokuar”, thuhet në njoftim të “Brezovica info”./teve1.info/
