Tanimë në Shqipëri janë mbyllur zyrtarisht 5200 qendrat e votimit, ku qytetarët kishin mundësi me votën e tyre të zgjedhin drejtuesit e 61 bashkive.
Sipas të dhënave të KQZ-së, 36.39 % e qytetarëve me të drejtë vota që kanë votuar deri në orën 18:00.
Në garë ishin 144 kandidatë. Zgjedhjet janë ndjekur nga afër, prej rreth 230 vëzhguesve ndërkombëtarë, pjesa dërrmuese e të cilëve ishin angazhuar nën drejtimin e misionit të ODIHR-it.
Lista e votuesve për zgjedhjet e sotme përmbante mbi 3 milionë e 650 mijë zgjedhës, ku përfshihen edhe emigrantët shqiptarë, të cilët ende nuk mund të votojnë nga vendet ku banojnë. Duke mbajtur parasysh numrin e lartë të tyre, votuesit real në zgjedhje mund të përllogariten diku te 30-40 përqind më pak.
Për drejtuesit e 61 bashkive në Shqipëri, konkurruan 144 kandidatë nga 40 parti dhe koalicione, përfshirë dy kandidatë të pavarur. Kurse, për 1603 pozicionet e anëtarit të Këshillave bashkiakë, kanë qenë të regjistruar rreth 23 mijë e 700 kandidatë, përfshirë 10 të pavarur.
Rezultatet paraprake pritet të publikohen menjëherë pas mbylljes së procesit, dhe do të bëhet një numërim manual paszgjedhor i të gjitha konfirmimeve, për të verifikuar saktësinë.
Procesi është përcjell me disa incidente e parregullsi/KP/
