Ura në fshatin Beluçe të Leposaviqit është mbyllur përkohësisht si pasojë e dëmtimeve nga vërshimet e fundit, ka bërë të ditur Policia e Kosovës.
Sipas njoftimit, Policia është angazhuar vazhdimisht në terren së bashku me institucionet e tjera relevante, përfshirë komunat përkatëse, Njësinë e Zjarrfikësve dhe Agjencinë për Menaxhimin e Emergjencave, për të menaxhuar situatën dhe për të parandaluar rreziqet për qytetarët.
“Lidhur me këtë rast, Policia ka njoftuar zyrtarët komunal të Leposaviqit si dhe përfaqësuesit nga Ministria e Infrastrukturës, të cilët kanë dalë në terren dhe kanë konstatuar se, për shkak të rrezikut për sigurinë, ura duhet të mbyllet. Si rezultat, ura është mbyllur përkohësisht deri në një vendim të radhës”, thuhet në njoftim.
Ndërkohë, vërshime janë evidentuar edhe në qytetin e Zveçanit dhe Mitrovicë Veri, ku katër familje janë evakuuar pasi shtëpitë e tyre u përmbytën nga reshjet e fundit.
Policia ka bërë të ditur se situata aktualisht është e menaxhueshme, duke vazhduar monitorimin e zonave të prekura dhe bashkëpunimin me institucionet përkatëse.
