Në orët e para të mëngjesit filluan aksionin.
Policia e Kosovës në koordinim me Prokurorinë Themelore të Pejës destinacion kishin objektet e strukturave paralele serbe në fshatrat e tri komunave, Pejë, Klinë dhe Istog.
Ndalesa e parë u bë në Gorazhdec të Pejës, aty ku u mbyll komuna ilegale serbe dhe u largua flamuri i Serbisë.
E aksioni vazhdoi në komunën paralele të Osojanit në Istog. Pastaj në Klinë.
Gjithë këtë aksion e përcolli ministri i punëve të brendshme, Xhelal Sveçla dhe ai i Administrimit të Pushtetit Lokal, Elbert Krasniqi.
Pas përfundimit të këtij aksioni, zëdhënësi i Prokurorisë Themelore të Pejës, Shkodran Nikçi, ka dhënë detaje për Tëvë1.
Ai tregoi që janë shoqëruan në polici shtatë persona e u konfiskuan dokumente të dyshuara.
“Janë konfiskuar dokumentet të cilat konsiderohen të dyshimta, janë hequr flamujt të cilët kanë qenë të vendosur në këto objekte dhe njëkohësisht personat të cilët dyshohen janë duke u intervistuar nga hetuesit policor dhe prokurori i shteti do të autorizoj që të hapet rasti penal ndaj tyre”, ka deklaruar ai.
Objektet paralele serbe janë mbyllur javë më parë edhe në Dragash.
