Urdhri për t’u larguar flamuri i Serbisë u respektua.
E gjithashtu edhe vendimi për të cilin shkuan hetuesit policorë e inspektorë të Ministrisë së Ndërmarrësisë, Tregtisë dhe Industrisë.
Nuk vonoi shumë u vendosën edhe shiritat e sigurisë.
Policia e Kosovës në orët e para të mëngjesit të së mërkurës kanë realizuar aksion të gjerë në dhjetë komuna në objektet e strukturave paralele serbe përfshirë edhe komunën e Graçanices, ku në këtë lokacion është mbyllur posta e Serbisë e cila ka vepruar në kundërshtim me ligjet e Republikës së Kosovës
Punëtorët e Postës së Serbisë u larguan nga aty, por me këtë vendim nuk qe i kënaqur drejtori i kësaj njësie në Graçanicë, Ivan Milojeviq.
Ai akuzoi kryeministrin e vendit Albin Kurti se ky vendim u bë për fushatë zgjedhore.
“E shihni çfarë ndodhi sot, erdhën policia të mbyllin postën. Thonë se është përkohësisht deri të aplikojmë për licencë. Por nuk shoh asgjë të përkohshme, as qëllim të përkohshëm, por tjetër qëllim. Si në veri, edhe në jug, qëllimi është që të largojnë postën nga tryeza në Bruksel. Sepse për postën po dialogohet, edhe shumë mirë e di Albin Kurti që po bisedohet por i duhet të bëjë film para zgjedhjeve. Edhe atë film të keq. Film si më parë kur me polici bënte shtypje dikush tjetër, sot ai e bën në popullin serb. Mendoj që është kampanjë negative, dhe që do t’i bie në kokë”, tha ai.
Aksioni vazhdoi pak metra më poshtë në komunën paralele serbe të Prishtinës e cila ka funksionuar sipas ligjeve të Serbisë.
Kështu u mbyllën 28 struktura paralele dhe 5 qarqe komunale të Strukturave Paralele serbe.
Për këtë veprim, reagim pati nga Ministri i Punëve të Brendshme, Xhelal Sveçla bashkë me ministrin e MAPL-së, Elbert Krasniqi.
“Nga sot kapitulli i institucioneve paralele, ilegale kriminale të Serbisë në Republikën e Kosovës mbyllën në Banjë e gjithandej pjesë tjera të Republikës së Kosovës objektet komunale, postat, zyrat tatimore dhe të të gjitha mbetjet e institucioneve paralele përfundojnë”, tha Sveçla
“Nga sot 28 komunat paralele kriminale të Serbisë në Kosovë në 5 qarqe të tyre mbyllen përfundimisht. Këto institucione paralele kriminale të Serbisë nuk kanë vend në Republikën e Kosovës”, tha Elbert Krasniqi, minister i Pushtetit dhe Administrimit Lokal.
Reagim të menjëhershëm pas këtij aksioni pati edhe nga Beogradi zyrtar.
“Ne po monitorojmë me vigjilencë zhvillimin e mëtejshëm të situatës dhe do të marrim të gjitha masat për të mbrojtur popullsinë serbe nga sulmet e reja të Albin Kurtit, i cili me sa duket e ka shndërruar fushatën e tij zgjedhore në vazhdim të shfryrjes ndaj popullit tonë”, tha kryeministri serb.
E në anën tjetër, nga Prokuroria Themelore në Prishtinë thanë se nuk e kanë autorizuar Policinë e Kosovës për të kryer kontrolle dhe bastisje në lokacionet ku u mbyllën struktura paralele serbe.
Sipas Prokurorisë, nuk ka pasur kërkesë zyrtare me shkrim për kryerjen e këtij aksioni nga institucionet gjegjëse, duke shtuar se s’ka pasur kurrfarë prove “për t’u krijuar dyshimi i bazuar se është duke u kryer ndonjë vepër penale që bie nën kompetencën e Prokurorisë Themelore në Prishtinë”.
