Victor Cakiqi (22 vjeç), talenti shqiptar nga Berlini, shpallet kampion i Gjermanisë në kategorinë velter (deri në 66.6 kg) dhe shpall ambiciet për të dominuar në skenën ndërkombëtare.
Gazeta gjermane “Bild” i ka kushtuar atij një artikull të gjatë, duke e vlerësuar të ardhmen e boksit gjerman.
Në një duel të zjarrtë në arenën MBS të Potsdamit, fundjavën e kaluar, Cakiqi mposhti me pikë rivalin e qytetit, Justin Schmager (29), duke regjistruar fitoren e tij të 13-të radhazi në karrierën profesioniste – 9 prej tyre me nokaut! Me këtë triumf, ai konsolidon pozitën si shpresa më premtuese e boksit gjerman dhe njihet gjithnjë e më shumë si “mbreti i ri i ringut” në Berlin.
Karriera e tij nisi që në moshën 8-vjeçare, kur për herë të parë veshi dorezat e boksit. Me një përvojë mbresëlënëse në ringun amator dhe një bilanc të pastër në nivel profesionist, Cakiqi tani synon një nivel më të lartë. Në krah ka trajnerin me përvojë Georg Bramowski (64), ish-bashkëpunëtor i legjendës Ulli Wegner.
I sigurt në aftësitë e tij, Cakiqi deklaron:
“Shikoj drejt Top 10 të Europës. Asnjëri prej tyre nuk është pengesë për mua – mund t’i mund të gjithë. Jam i hapur ndaj kujtdo, për sa kohë më çon më afër majës.”
Ai shprehet edhe për qëllimin më të madh: t’i rikthejë lavdinë boksit gjerman, në kohë kur emra si Arthur Abraham ishin krenaria e ringut:
“Sot, Gjermania nuk ka më një reputacion të fortë në boks si dikur. Arthur Abraham e ringjalli sportin këtu. Unë dua ta bëj që vendi im të shkëlqejë sërish.”
Pas tij qëndron edhe promovuesi i njohur Almin Kuc dhe mbështetja e sponsorëve familjarë, të cilët i mundësojnë të jetojë si profesionist:
“Faleminderit promovuesit tim Almin Kuc dhe sponsorëve të familjes, që më japin mundësinë të përqendrohem vetëm te boksi. Ushqimin, trajnimet, mjekimet – gjithçka e kam të mbuluar. Që kur isha fëmijë, stërvitesha me babain tim në kopsht. Atje vendosëm një thes boksi. Sot gjithçka po shpërblehet – nuk ka pasur kurrë një plan B për mua.”
Cakiqi e nisi karrierën profesioniste vetëm në verën e vitit 2022. Këtë vit u bashkua me klubin e njohur KUC Boxing në Berlin, dhe ndeshja e fundit ishte e para nën flamurin e këtij stalli.
Promovuesi Almin Kuc vlerëson lart talentin e Cakiqit, por thekson se rruga drejt majës është e gjatë:
“Për t’u afirmuar plotësisht, ai duhet të mposhtë disa kundërshtarë të fortë nga Gjermania. Kategoria velter është tejet konkurruese në Europë. Por unë besoj se deri në vitin 2027 ai do të fitojë titullin europian WBU. Duhet disiplinë dhe këmbëngulje. Ai nuk duhet të humbasë tokën nën këmbë. Me fuqinë që ka në duar, çdo ndeshje mund të përfundojë me nokaut – si dikur me Arthur Abraham. Dhe pikërisht këtë duan të shohin tifozët.”
Sfida e radhës për Cakiqin pritet të zhvillohet muajin e ardhshëm – kundërshtari ende nuk është përcaktuar.
