Forca e Sigurisë së Kosovës ka bërë të ditur se të enjten në Komandën e Doktrinës dhe Stërvitjes (KDS), ka përfunduar trajnimi i realizuar nga ekipi britanik BMATT (British Military Advisory Training Team).
Sipas njoftimit, trajnimi ka qenë i formatit rezident dhe ka pasur për qëllim përgatitjen dhe certifikimin e instruktorëve të kualifikuar në përputhje me standardet moderne të edukimit ushtarak.
“I pranishëm në ceremoninë e certifikimit ishte Ambasadori i Mbretërisë së Bashkuar në Kosovës, z. Jonathan Hargreaves, Komandanti i KDS-së, Gjeneral brigade Jeton Dreshaj, oficer e nënoficer të njësive të FSK-së”, bëhet e ditur në njoftim.
Ky bashkëpunim thuhet se dëshmon përkushtimin e FSK-së për ngritjen e kapaciteteve të saj profesionale në përputhje me standardet ndërkombëtare dhe partneritetin e qëndrueshëm me Mbretërinë e Bashkuar.
