Që prej arritjes së marrëveshjes në fund të muajit të kaluar për të rifilluar eksportet, janë miratuar 36 kalime anijesh me grurë, tha OKB, duke shtuar se 21 anije u larguan nga portet e Ukrainës në drejtim të Bosforit.
Gjithsej 27 anije mallrash u kontrolluan në Turqi sipas marrëveshjes.
Vlerësohet se mbi 20 milionë ton drithë dhe produkte të tjera janë bllokuar në Ukrainë që nga fillimi i luftës, 24 shkurt, të cilën Rusia e pagëzoi si “operacion special ushtarak”, duke vendosur bllokadë në portet e vendit fqinj.
Nga produktet e eksportuara, më shumë se një e katërta shkoi në Turqi, 22% në Iran dhe Korenë e Jugut, 8% në Kinë dhe 6% në Irlandë, sipas shifrave të OKB-së.
Të martën, më 16 gusht, “Brave Commander”, një anije mallrash e marrë me qira nga organizata, u nis me destinacion Afrikën Lindore, për të transportuar grurë në Etiopi.
Sipas llogaritjeve të OKB-së deri më tani janë eksportuar në total 560 mijë tonë grurë.
Në fund të korrikut, palët ndërluftuese Rusi-Ukrainë ranë dakord për garancitë e ndërmjetësuara nga OKB-ja dhe ndërmjetësimi i Turqisë për të hapur një rrugë detare për të lejuar Ukrainën të rifillojë eksportin e produkteve agro-ushqimore përmes porteve të saj të Detit të Zi, pavarësisht luftës me Rusinë.
OKB-ja ka paralajmëruar për muaj të tërë kundër rrezikut të mungesës së ushqimit dhe urisë në vendet e varfra të botës nëse Ukraina, një furnizues kryesor ndërkombëtar, nuk arrin të rifillojë eksportet që u pezulluan kur ushtria ruse pushtoi territorin e saj më 24 shkurt./abcnews.al/