Në vendin tonë janë 38 komuna, ndërsa vetëm 15 kryetarë komunash nga 28 sa e kishin konfirmuar pjesëmarrjen, ishin prezentë sot në takimin e thirrur nga kryeministri i Kosovës, Albin Kurti dhe ministri i Administrimit Lokal dhe Pushtetit, Elbert Krasniqi. Pas takimit rreth dy orë, Krasniqi tha se u diskutua për problemet specifike të komunave.
Ndërkaq, i pyetur nëse po zvarritet procesi për zgjidhjen e kryetarëve të komunave në veri të vendit, Krasniqi potencoi se një gjë e tillë nuk po ndodhë sipas tij. Ai theksoi se të gjitha nënshkrimet që kanë kërkuar largimin nga funksioni i kryetarit janë dorëzuar në Komisionin Qendror Zgjedhor (KQZ), për çka shtoi se u takon atyre për të marrur një vendim.
Krasniqi, të rëndësishëm e vlerësoi faktin që për herë të parë janë ndarë 742 milionë euro për nivelin lokal, për çka shpreson që projektet të ndikojnë drejtpërdrejt në jetën e qytetarëve.
Krasniqi tha se kanë pasur 28 konfirmime, prej tyre 15 komuna morën pjesë.
“Në vazhdimësi diskutojmë për problemet e tyre, secila komunë ka specifikat e veta, mirëpo ka edhe problematikat e përgjithshme. Shumë e rëndësishme që e potencuam që është viti i parë ku janë mbi 742 milionë euro për niveli lokal nga niveli qendror dhe këto projekte shpresoj që do të ndikojnë drejtpërdrejt në jetën e qytetarëve…Ne kemi pasur 28 konfirmime prej tyre 15 komuna patën përfaqësues dhe të tjerët nuk morën pjesë me asnjë paralajmërim tjetër. Por, ndodhë që në një takim të ketë më shumë kryetarë, ndërsa tek të tjerë më pak…Nuk besoj që është konstatim i drejtë që thuhet se po zvarritet procesi, ku qeveria ka pasur një vullnet për ta përpiluar udhëzimin administrativ brenda një muaji dhe këtë e kemi bërë”, tha Krasniqi.
Ndërkaq, para se të fillonte takimi i mbyllur mes Kurtit, Krasniqit dhe kryetarëve e përfaqësuesve të komunave, u tha se ndër çështjet kryesore për të cilat do diskutohet janë regjistrimi i popullsisë dhe problemi me qentë endacak./kp
