Të paktën 36.439 palestinezë janë vrarë në ofensivën e vazhdueshme të Izraelit në Rripin e Gazës që nga tetori i kaluar, tha sot Ministria e Shëndetësisë në enklavën e rrethuar, transmeton Anadolu.
Në deklaratën e saj, Ministria tha se 82.627 persona të tjerë janë lënduar gjithashtu nga sulmet.
“Sulmet izraelite vranë 60 persona dhe plagosën 220 të tjerë në 24 orët e fundit”, thuhet në deklaratë.
“Shumë njerëz janë ende të bllokuar nën rrënoja dhe në rrugë pasi shpëtimtarët nuk janë në gjendje t’i arrijnë ata”, thuhet më tej, raporton Andodolu.
Izraeli ka zhvilluar një ofensivë të pandërprerë në Rripin e Gazës që nga një sulm ndërkufitar nga grupi palestinez Hamas më 7 tetorin e kaluar, në të cilin Tel Avivi thotë se u vranë rreth 1.200 njerëz.
Gati tetë muaj pas fillimit të luftës izraelite, zona të gjera të Gazës janë në rrënoja, krahas një bllokade gjymtuese të ushqimit, ujit të pastër dhe ilaçeve.
Izraeli akuzohet për “gjenocid” në Gjykatën Ndërkombëtare të Drejtësisë, e cila në vendimin e saj të fundit ka urdhëruar Tel Avivin të ndalojë menjëherë operacionin e tij në Rafah, një qytet në Gazën jugore ku më shumë se një milion palestinezë të zhvendosur kishin kërkuar strehim.
