Mbi 100 organizata humanitare lëshuan një apel urgjent për qeveritë në mbarë botën të mërkurën që të ndërmarrin veprime urgjente për t’i dhënë fund rrethimit izraelit në Rripin e Gazës dhe për të rivendosur aksesin e plotë humanitar mes urisë së përhapur në enklavë.
“Çdo mëngjes, e njëjta pyetje përsëritet në të gjithë Gazën: a do të ha sot?” tha një përfaqësues i njërit prej 109 nënshkruesve të apelit të ndarë nga Save the Children, një organizatë joqeveritare me seli në Mbretërinë e Bashkuar.
Dy muaj pasi Fondacioni Humanitar i Gazës i mbështetur nga qeveria izraelite filloi operacionet e ndihmës në Gaza, grupet humanitare thonë se qasja mbetet shumë e kufizuar.
Pavarësisht tonelatave të ushqimit, ujit, furnizimeve mjekësore dhe karburantit që ndodhen në depo, përfshirë disa që ndodhen tashmë brenda Gazës, ndihma nuk po arrin tek mbi dy milionë njerëz të bllokuar në atë që Save the Children e përshkruan si një “rrethim total”.
“Sistemi humanitar i udhëhequr nga OKB-ja nuk ka dështuar. Funksionimi i tij është penguar”, thuhet në deklaratën e përbashkët.
“Agjencitë humanitare kanë kapacitetin dhe furnizimet për të reaguar në shkallë të gjerë. Por, me qasjen e mohuar (nga Izraeli), ne jemi të bllokuar për të arritur ata që kanë nevojë, përfshirë ekipet tona të rraskapitura dhe të uritura.”
Organizatat e ndihmës kërkuan hapjen e menjëhershme të të gjitha kalimeve tokësore, rivendosjen e një armëpushimi parimor dhe të përhershëm.
“Fëmijët u thonë prindërve të tyre se duan të shkojnë në parajsë, sepse të paktën parajsa ka ushqim”, tha një punonjës i mbështetjes psikosociale.
Konvojet e ndihmave aktualisht arrijnë mesatarisht vetëm 28 kamionë në ditë, një pjesë shumë e vogël e asaj që nevojitet. OKB-ja ka deklaruar vazhdimisht se të paktën 500 deri në 600 kamionë në ditë janë të nevojshëm për të përmbushur nevojat minimale të popullsisë së Gazës.
Organizatat gjithashtu lëshuan një qortim të ashpër ndaj të ashtuquajturave “marrëveshje pjesë-pjesë”, siç janë lëshimet nga ajri dhe korridoret e përkohshme, duke i quajtur ato gjeste simbolike që shërbejnë si një perde tymi për mosveprim politik.
“Ato nuk mund të zëvendësojnë detyrimet ligjore dhe morale të shteteve për të mbrojtur civilët palestinezë dhe për të siguruar akses kuptimplotë në shkallë të gjerë”, thuhet në deklaratë, raporton Anadolu.
Në një nga kërkesat e saj më të theksuara, koalicioni u bëri thirrje shteteve të marrin në konsideratë ndalimin e transferimit të armëve dhe municioneve për të ushtruar presion mbi Izraelin që t’i japë fund rrethimit të Gazës.
“Qeveritë duhet të ndalojnë së prituri leje për të vepruar”, thanë organizatat. “Shtetet mund dhe duhet të shpëtojnë jetë – përpara se të mos mbetet asnjë për të shpëtuar.”
Të mërkurën në mëngjes, Ministria e Shëndetësisë e Gazës tha se dhjetë palestinezë të tjerë vdiqën nga uria dhe kequshqyerja në Rrip gjatë 24 orëve të fundit, duke e çuar numrin e të vdekurve që nga tetori i vitit 2023 në 111.
