Thuajse çdo të diele vjen këtu në tregun e veturave në Prishtinë.
Por, ajo se çfarë po i sheh syri e po i nuhat hunda, nuk po i pëlqen Mehdi Shaqirit.
Ai është i mllefosur nga gjendja në të cilën ka mbetur tregu.
“Gjenda është katastrofale, çfarë ere, mundemi me marr edhe ndonjë epidemi. Unë, nuk e di a e pastrojnë ndonjë firmë këndej a kush e ka veç tmerr është. Ne i kemi dhënë votat për me u bë më mirë, por këtu është shumë keq, këta punëtorë këta që shëtisin këndej është shumë keq se maskën duhet me vendos”, thotë Mehdi Shaqiri – qytetar
Shaqiri madje thotë se do të ndihmonte vullnetarisht që të mirëmbahej kjo pjesë.
“Duhet me marr një veprim sa më të shpejtë që me rregulluar këtë gjendje. Për bese që unë jam punëtorë, por pa pare po vijë këtu po ju ndihmojë nëse ka mundësi për një punëtore për me punuar këtu, kurdo le të më bëjnë kërkesë unë po vijë”, thotë ai.
E si kundërmim i erërave që po vijë në këtë zonë, qytetari Nexhat Zekolli thotë se nuk do të vije në treg më.
“Ishte një pjesë më mbeturina nuk e di qysh lejohet ajo, por nuk e di edhe populli qysh e viziton. Unë për vete në të ardhmen nuk vijë kurrë e nuk i preferoj askujt për me ardh. Se ishte një katastrofë e madhe ishin mbeturina që kishin aromë shumë të rëndë”, shprehet Zekolli.
Qytetarët kanë mendime të ndryshme se kush është fajtor për gjendjen e krijuar.
“Kush po i hedhë ato unë, ti, u krye ne jemi ata se ne nuk mundemi me ia lënë fajin higjienikut. Ai nuk mundet me qese me ardh pas meje e me thanë mos e hedh në tokë, por ne qese. Se pari ne duhet me u edukuar”, thotë Muharrem Kazasi.
“Është katastrofë prej që e mbaj mend kështu, ka mbeturina e erëra të ndryshme. Qeveria këtu krejt fajet i ka qeveria se nuk ka kontrolle”, shprehet Veli Krasniqi.
Këtë zonë, drejtori i kompanisë “Pastrimi”, Petrit Reçica thotë se nuk e kanë për obligim që ta pastrojnë.
“Ajo është deponi ilegale, ajo është nën Drejtorinë e Shërbimeve Publike dhe ne nuk e kemi obligim me i kryer për shkak se ne në bazë të rregullores tani e kryejmë shërbimin e bizneseve dhe ato që i kemi të kontraktuara dhe qytetarët. Ajo pjesë është ilegale është mirë inspekcioni i Prishtinës me e pa se kush po i hedh për shkak se nuk është lokacionin për hedhjen e mbeturinave dhe e dyta nëse Komuna vlerëson se ne duhet me i largu mundet me na bë kërkesë zyrtare dhe normalisht ne e largojmë për shkak se ka kosto dhe në bazë të kërkesave e bëjmë edhe faturimin e shërbimit”, ka thënë Reçica.
Televizioni gjatë gjithë javës ka pritur për një qëndrim nga Komuna e Prishtinës, mirëpo ata nuk janë përgjigjur.
