Gjendja e lumit Morava në Malishevë të Gjilanit pasditen e së mërkurës ishte normale.
Por në këtë lum një ditë më parë rridhte uji me ngjyrë të kuqe.
Deri këtu erdhi pasi dyshohet se në lum ishin hedhur mbetje gjaku dhe mbetje fundërrinore.
Kështu thanë nga drejtoria e Inspeksionit të Komunës së Gjilanit.
“Gjatë 24 orëve të fundit në Drejtorinë e Inspeksionit kemi pasur ankesa nga qytetarët lidhur me ndotje të lumit me gjak dhe me mbetje fundërrinore nga një thertore. Inspektorët kanë dalë në vendin e ngjarjes, kanë hartuar procesverbal dhe kanë shqiptuar gjobë konform rregullores komunale”, tha Entela Hyseni, Drejtoreshë e Inspeksionit në Komunën E Gjilanit
Por në njërën prej thertoreve që komuna thotë se i është shqiptuar gjobë, mohojnë se kanë pranuar një të tillë, ndonëse gjatë ditës ishte vizituar nga inspektorët.
“Nuk është e vërtetë që kemi pas gjoba prej inspektorëve komunal. Këtë besoj ua dëshmojnë edhe inspektorët të cilët janë sepse kompania jonë i posedon të gjitha pajisjet, pajisjet për trajtimin e ujërave të cilat vijnë prej fabrikës gjithashtu edhe për mbetjet të cilat dalin nga fabrika. Për këtë i posedojmë edhe lejet mjedisore prej ministrisë së Mjedisit dhe Kuvendit Komunal”,tha Adil Spahiu, pronar i kompanisë “Malësia”
E përfaqësuesit lokal thonë se shqetësimet për ndotjen e lumit i kanë prej dy vitesh.
Asamblisti nga radhët e LDK-së në komunën e Gjilanit që vjen nga ky fshat, Latif Maliqi, dyshon se ndotja po bëhet qëllimisht.
“Kjo ka ndodh në mënyrë sistematike. Gjithmonë prej orës 16:00, 16:15 ose e shtunë e diel, kur e gjejnë një vakuum të cilën institucionet nashta lirohen prej punës apo nuk janë në vendin e punës”, tha ai.
Ankesa për ndotje të lumenjve nga thertoret qytetarët e Gjilanit kanë bërë edhe në të kaluarën.
Raporti i gazetarit Gojart Jashari.
