Që nga 16 nëntori ku me ndërmjetësimin e të dërguarit evropian, Miroslav Lajçak në Bruksel u takuan kryenegociatori i Kosovës, Besnik Bislimi dhe kryenegociatori serb Petar Petkoviq, më nuk ka ndodhu asnjë lëvizje në kuadër të procesit të dialogut.
Deri më tani ende nuk është vendosur ndonjë datë për takimi në Bruksel. Por, në anën tjetër partitë parlamentare kanë qëndrime të ndryshme në lidhje me fazën aktuale të dialogut.
Me anë të një përgjigje me shkrim nga Zyra për Media dhe Komunikim e Lëvizjes Vetëvendosje kanë deklaruar se për rrugën tutje është i rëndësishëm sanksionimi i Serbisë, për sulmin terrorist të 24 shtatorit.
“Ajo që kemi insistuar në vazhdimësi se Serbia nuk është e interesuar për marrëveshje e normalizim po provohet si e vërtetë. Në tre takimet, Bruksel, Ohër dhe së fundmi sërish në Bruksel Aleksandar Vuçiq ikën nga nënshkrimi, ndërkaq gjatë kohës sa nuk nënshkruan nuk rresht së luftuari Republikën e Kosovës, si në lobim ashtu edhe në organizimin dhe financimin e grupeve terroriste siç ishte ai i 24 shtatorit. Prandaj, sanksionimi i Serbisë nuk është i domosdoshëm vetëm në drejtim të dënimit të aktit të 24 shtatorit, por edhe parandalimit të përsëritjes së akteve të tilla”, thuhet nga LVV-ja.
Nga LDK si parti opozitare akuzojnë Qeverinë për mos-transparencë në dialog dhe thonë se për këtë vit nuk presin ndonjë progres në negociata.
Njohësi i çështjeve politike Fidan Ukaj thotë se nuk pret ndonjë përparim në dialog pa përfunduar zgjedhje në Serbi.
Liderët evropian në letrën e tyre të përbashkët kanë deklaruar se sa i përket obligimeve të palëve është që Kosova të bëjë asociacion, ndërsa Serbia të realizoi njohjen de-fakto ndaj Kosovës.
