I dërguari special i presidentit amerikan, Donald Trump për Ukrainën dhe Rusinë, gjeneral lejtnant në pension Keith Kellogg, mbërriti në Kiev të hënën, sipas një zyrtari të lartë ukrainas, ndërsa pritjet për një ndryshim në politikën e administratës Trump ndaj luftës po rriten.
Javën e kaluar, Trump njoftoi se do të bënte një “deklaratë të rëndësishme” për Rusinë të hënën. Ai e ka vendosur përfundimin e shpejtë të luftës si një nga prioritetet kryesore të politikës së jashtme dhe është treguar gjithnjë e më kritik ndaj mungesës së bashkëpunimit të presidentit rus, Vladimir Putin me përpjekjet për paqe.
“Putini flet mirë dhe pastaj bombardon të gjithë,” tha Trump të dielën në mbrëmje, duke konfirmuar gjithashtu se SHBA do t’i dërgojë Ukrainës raketat mbrojtëse ajrore Patriot, për të ndihmuar në përballimin e sulmeve të shtuara nga Rusia.
Sipas OKB-së, qershori ishte muaji me më shumë viktima civile në tre vitet e fundit, me 232 të vrarë dhe mbi 1,300 të plagosur, për shkak të sulmeve me dronë dhe raketa që Rusia ka shtuar ndjeshëm krahasuar me një vit më parë, raporton AP.
Në të njëjtën kohë, forcat ruse po përpiqen të fitojnë terren në disa zona të vijës së gjatë të frontit prej 1,000 kilometrash.
Senatori republikan Lindsey Graham, një aleat i ngushtë i Trumpit, deklaroi se lufta është afër një pike kthese. Ai tha se Trump po tregon gjithnjë e më shumë vullnet për të ndihmuar Ukrainën, një ndryshim i madh nga qëndrimi i tij i mëparshëm, kur ndihmën për Kievin e shihte si një barrë për taksapaguesit amerikanë.
“Në ditët në vijim do të ketë furnizime rekord me armë për Ukrainën,” tha Graham në CBS. “Putini gaboi rëndë duke menduar se mund ta manipulonte Trumpin. Shikoni çfarë do të ndodhë – do të ketë përpjekje të mëdha për ta detyruar të ulet në bisedime.”
