Real Madridi ka konfirmuar se sulmuesi Kylian Mbappe udhëtoi për në Francë për teste të mëtejshme, me qëllim të vlerësimit të progresit të dëmtimit të gjurit të tij.
“Pas testeve të kryera nga specialistë francezë, nën mbikëqyrjen e Shërbimeve Mjekësore të Real Madridit, është konfirmuar diagnoza e një shtrembërimi në gjurin e majtë të Mbappe. Po ndiqet trajtim konservativ dhe progresi i tij do të monitorohet vazhdimisht”, thuhet në njoftim.
I pyetur nga mediat, trajneri Alvaro Arbeloa theksoi se nuk do të jepen afate për kthimin e Mbappe, edhe pse sipas analizave të para, mungesa do të shkojë deri në tri javë.
Trajneri spanjoll ka nënvizuar se shqetësimi filloi më 7 dhjetor kundër Celta Vigo dhe që nga atëherë e ka penguar atë të luajë në maksimum.
Mbappe pritet të kthehet në ndeshjen kthyese të 1/8 së finales të Ligës së Kampionëve, që Real Madridi e luan kundër Manchester Cityt.
