Gjatë ditës së sotme është organizuar takimi vjetor me Suedinë, me ç’rast zëvendëskryeministri Besnik Bislimi priti delegacionin suedez, i cili kryesohej nga ambasadori i Suedisë në Kosovë, Jonas Westerlund.
Siç bëhet e ditur në komunikatën e Qeverisë, në fokus të këtij takimi, ishte bashkëpunimi me shtetin e Suedisë dhe projektet e përbashkëta, ku u rishikuan dhe biseduan projektet ekzistuese dhe format për thellimin e marrëdhënieve mes dy shteteve.
Me këtë rast, Bislimi falënderoi Qeverinë suedeze dhe popullin suedez për ndihmën dhe mbështetjen e vazhdueshme për Kosovën në shumë procese, përcjell teve1.info
“Sot do të kemi mundësinë të reflektojmë mbi arritjet e deritanishme dhe do të diskutojmë mbi sfidat me të cilat jemi përballur gjatë zbatimit. Dua të ritheksoj se Qeveria e Kosovës vlerëson shumë faktin që ndihma e marrë nga partnerët tanë është e koordinuar, për të arritur ndikimin maksimal, duke e fokusuar këtë ndihmë në projekte brenda fushave të identifikuara si prioritare për zhvillimin e vendit”, është shprehur ai.
Delegacioni i Kosovës përbëhej dhe nga Ministri i Financave, Punës dhe Transfereve, Hekuran Murati, Ministri i Administrimit të Pushtetit Lokal, Elbert Krasniqi dhe Ministri i Kulturës, Rinisë dhe Sportit, Hajrullah Çeku. /Teve1.info/