Këshilli Gjyqësor i Kosovës (KGJK) të martën ka organizuar konferencën vjetore, në të cilën kryesuesi Albert Zogaj foli për të arriturat dhe sfidat e gjyqësorit gjatë vitit 2023.
Në këtë ngjarje, kryesuesi i KGJK-së, Albert Zogaj, përmendi reformat për forcimin e mekanizmave të brendshëm në gjyqësor, sikurse janë reforma në Gjykatën Administrative, Kodi i Procedurës Penale dhe reforma në Dhomën e Posaçme të Gjykatës Supreme, raporton “Betimi për Drejtësi“.
Ai tha se kanë përforcuar mekanizmat e brendshëm përmes sistemit të performancës së gjyqtarëve, sistemin e disiplinimit, statusin e gjyqtarëve, statusin e administratës gjyqësore, integritetin, zhvillimin e shkathtësive, e tjera. Kurse, theksoi se kanë pranuar se performanca e gjyqtarëve të bëhet përmes vlerësimit cilësor dhe jo sasior.
Zogaj tha se temë më kritike ka qenë kontrolli i integritetit.
“Është e rëndësishme që të kemi mekanizma që e bëjnë këtë në mënyrë permanente, por jo ndonjë mekanizëm që cenon pavarësinë e gjyqësorit”, tha Zogaj.
Çështje tjetër ai tha se është statusi i gjyqtarëve, pasi sipas tij jemi ndër të paktat vende që nuk kemi statusin e gjyqtarëve prej përzgjedhjes deri në fund, e për këtë tha se do të punohet vitin e ardhshëm.
Sipas tij, Strategjia për qasje në drejtësi, ka kontribuar në efikasitetin e zgjidhjes së lëndëve.
“Kemi rritë numrin e gjyqtarëve dhe bashkëpunëtorëve profesional, për herë të parë kemi aplikuar lëvizjen e gjyqtarëve dhe lëndëve nëpër gjykatat e Kosovës. Situata në veri ka bërë që të bëjmë disa lëvizje në Gjykatën në Mitrovicë, për funksionimin normal. Do lëvizin edhe 13 lëndë në Gjykatën Themelore në Mitrovicë, që do të kalojnë në Gjykatën Themelore në Prishtinë”, tha ai.
Zogaj përmendi edhe statistikat e gjykatave lidhur me lëndët aktive, ku tha se Supremja ka 86% efikasitet, me 447 lëndë aktive.
I njëjti theksoi se edhe Apeli ka pranuar numër të madh të lëndëve, por tha se janë në mungesë të gjykatësve, megjithatë efikasiteti ka qenë 91%.
Sukses të jashtëzakonshëm, Zogaj tha se ka pasur edhe Gjykata Komerciale, e cila ka pranuar më shumë dosje sesa është paraparë. Tutje, ai foli edhe për statistikat e lëndëve në Themelore.
Zogaj tha se për vitin e ardhshëm synojnë ta rrisin përqindjen e gjyqtareve gra. /BetimipërDrejtësi
