Të enjten u mbajt ceremonia e varrimit për tridhjetë nga gjithsej 59 persona që humbën jetën nga zjarri që shpërtheu në një klub nate në Koçan të Maqedonisë së Veriut.
Të afërm dhe qytetarë të shumtë morrën pjesë në ceremoninë mortore që u mbajt në Varrezën e Qytetit në Koçan.
Fotografitë e shumë të rinjve me shirit të zi, qëndrojnë në qendër të Koçanit mes lulesh dhe qirinjve që u ndezën nga qytetarë të shumtë.
“Jetojmë në fund të qytetit, dëgjojmë vetëm heshtjen, e dini sa është e tmerrshme të dëgjosh vetëm heshtjen, qyteti është i vdekur këto ditë, më vjen keq”, u shpreh një qytetare, raporton Alsat-mk.
Ndërkohë, 29 persona të tjerë në mesin e viktimave që humbën jetën, 5 tashmë janë varrosur në Shtip, kurse ceremonitë do të vazhdojnë në qytete të tjera të vendit për viktimat e mbetura.
Maqedonia e Veriut ka shpallur shtatë ditë zie pas tragjedisë.
