Në teatrin “Avdush Hasani” në Podujevë është mbajtur akademi përkujtimore për komandantin Nazmi Ajeti. Të pranishmit lartësuan veprën e tij dhe treguan momentet që kishin kaluar me të.
Familjarë të dëshmorëve, ish të burgosur politik dhe invalidë e veteranë të UÇK-së u mblodhën të shtunën në teatrin Avdush Hasani në Podujevë.
Aty përkujtuan veprën e komandantit Nazmi Ajeti.
E fjalën fillimisht e mori ish profesori i tij, Fadil Aliti.
“Nazi pastaj nuk ka ardhur një vit në shkollë, sepse ka mbajtur një vit burg e në fund të vitit tjetër u kthye prapë dhe ka mbajtur vitin e katërt”, tha ish-profesori i komandantit, Nazmi Ajeti.
Nga Kukësi erdhën edhe bashkëveprimtarë të tij.
“Me Nazmi më ka rënë një dyherë që kam qenë vetëm me të kemi shku deri në kufi vetëm të gjejmë armatimin tani ka vazhdu prapë se kishte edhe shokë tjerë ai që kapërcejke armatimin”, tha bashkëveprimtari Bajram Kovaçi.
Kohën në burgun e Gurrakocit bashkë me Ajetin e kujtoi edhe një ish i burgosur politik.
“Me Nazmi Ajeti jemi njohur në rrethana të jashtëzakonshme në burgun e Gurrakocit, aty ku plot të rinjë i sjellshin të dënuar për pjesëmarrje në demonstrata dhe ne që kishim bërë disa vite burg ishim në fundin e burgut dhe të paktën ishim në vitin e tretë dhe të katërt të burgut me plot shokë tjerë. Kur na erdhën këta djem të rinj që dikush si kishte mbush ende 17 vjet vërtetë ishte e rëndë”, tha ish i burgosuri politik, Osman Shahini.
Fjalë të mëdha tha edhe një bashkëluftëtar i heroit.
“Ai bashkë me luftëtarët e tij nga zona e Llapit dhe Karadakut kanë qëndruar me ditë të tëra në shtëpinë time. Gjatë viteve 98-99. Më 4 nëntor një rrugëtim të rrezikshëm iu pata bashkuar grupit të Llapit që drejtonte varësi i komandantit të Nazit, në atë rrugëtim gjatë gjithë kohës unë dhe ndihmësi i komandantit, Shaban Kurtolli kemi pasur në mes tashmë heroin Tahir Sinani”, tha bashkëluftëtari Ruzhdi Kryeziu.
E në emër të familjes foli Flaka Ajeti, e cila falënderoi ata që kontribuan për vendin.
“Sakrifica juaj sublime ka bërë të mundur lirinë që e gëzojmë sot gjaku dhe mundi juaj janë themeli i shtetit tonë dhe frymëzim për brezat që do të vinë”, tha familjarja e familjes Ajeti, Flaka.
Krejt në fund, Organizata e Veteranëve të Luftës në Podujevë dhuroi mirënjohje për fëmijët e Nazmi Ajetit.
