Fotografi i botës së egër, Arian Mavriqi, së bashku me kryetarin e Kamenicës, Kadri Rahimaj kanë prezantuar master planin për “Bashqën”.
Gjatë prezantimit të master planit, ku morën pjesë edhe ideatorë të projektit dhe përfaqësues të shoqërisë civile, u shpalosën planet për zhvillimin e kësaj hapësire, e cila pritet të përfshijë disa përmbajtje të reja për Kamenicën.
Autori i dokumentarit “Wildlife me Arian Mavriqin” në Tëvë1, theksoi se një ndër elementet më të rëndësishme të projektit është Muzeu i Natyrës, që sipas tij është një ide e kamotshme dhe një nevojë e madhe për Kosovën.
“Përveç bukurive tjera që do ndërtohen aty, do jetë edhe Muzeu i Natyrës, një ëndërr e imja e kamotshme, por edhe dëshirë e plot të tjerëve, sepse Kosova akoma nuk ka Muze të Natyrës (Kafshëve të egra)”, ka shkruar ai në Facebook.
Ai ka shprehur keqardhje që disa nga personat që kanë deklaruar për mbështetje nuk kanë marrë pjesë në takimet ku është diskutuar për këtë çështje.
Sipas tij, realizimi i këtij projekti do të ishte shumë i rëndësishëm për zhvillimin e qytetit, duke shtuar se Kamenica me këtë investim mund të shndërrohet në një destinacion tërheqës edhe për turistë të huaj.
Mavriqi ka shprehur shpresën që projekti “Bashqa” të realizohet sa më shpejt, duke e cilësuar atë si një iniciativë të nevojshme për promovimin e natyrës dhe turizmit në Kosovë. /teve1.info/
