Anëtari i Nismës Social demokrate, Fatmir Matoshi ka deklaruar se kryetari i kësaj partie, Fatmir Limaj gjatë kësaj jave do ta fton në takim kryeministrin në detyrë, Albin Kurti për një konsultim të një zgjidhjeje të ngërçit politik.
Sipas Matoshit, situata në Kuvend sipas tij është më alarmante se sa që paraqitet nga politikanët dhe deputetët që paraqiten aty çdo 48 orë për të mbajtur seancën konstituive.
I pyetur se Limaj a do t’i zbutë kërkesat për postin e kryetarit të Kuvendit, ky i fundi thotë se Limaj nuk i ka pasur kërkesat e ashpra.
Derisa, ai mendon se Limaj do të ishte kandidati i pranueshëm për kryetar të Kuvendit, pasi që sipas tij është bashkëpunues.
Në fund, anëtari i kësaj partie shtoi se Limaj do të ishte në favor të Kurtit dhe partisë së tij.
“Realisht unë mendoj që gjendja është pak më keq se sa që paraqitet nga politikanët dhe nga deputetët që shkojnë çdo dytën ditë në sallën e Kuvendit për të qëndruar tre katër minuta dhe për të ikur, kjo nuk është dashur me i ndodh Kosovës. Nisma e ka lexuar më së miri rezultatin e zgjedhjeve të 9 shkurtit, ne jemi të pakënaqur me atë rezultat si parti politike. Ne kemi insistuar gjithmonë në dialog, fillimisht qëndrimi ynë që e kemi parapëlqyer një qeveri që deri tani kanë qenë në opozitë, duket kjo që është e pamundur pasi që as LDK-ja dhe PDK-ja nuk e ka bërë punën e tyre që do të duhej ta bënin. Takime sy më sy nuk ka pasur, do të kemi shumë shpejt iniciativa këtë radhë është e kryetarit Limaj, një takim do të ndodh shpejt gjatë kësaj jave për me shpreh edhe njëherë vullnetin tonë që e kemi që Kosova të ketë një shumicë të re parlamentare….Nisma nuk i ka pasur të ashpra kërkesat që me i zbutë tani, ne besojmë që Limaj do të ishte dhe është kandidati më i pranueshëm për me qenë kryetar Kuvendi, kjo do të ishte edhe në favor të Kurtit edhe LVV-së, sepse është më bashkëpunues ka punua me gjithë ata njerëz, i njeh të gjithë”, ka deklaruar Matoshi në emisionin “Ditari” në tëvë1./teve1.info/
