Ministria e Arsimit, Shkencës, Teknologjisë dhe Inovacionit (MASHTI) ka njoftuar se sot kanë filluar pagesat e para për furnizimin me tekste shkollore dhe materiale mësimore për nxënësit e Kosovës.
Sipas njoftimit, deri më tani përmes platformës e-Kosova janë pranuar gjithsej 183.226 aplikime, të cilat janë në proces verifikimi nga koordinatorët e shkollave dhe Drejtoritë Komunale të Arsimit.
“MASHTI njofton opinionin publik se deri sot përmes platformës e-Kosova, janë pranuar gjithsej 183.226 aplikime për furnizim me tekste shkollore dhe materiale mësimore. Të gjitha aplikimet janë duke u verifikuar nga koordinatorët e shkollave dhe DKA-të. MASHTI njofton se sot kanë filluar pagesat e para ku janë ekzekutuar 9.634.000,00 euro për 120.425 aplikues,” thuhet në komunikatë.
Ministria thekson se procesi i aplikimit mbetet i hapur.
“Procesi i aplikimit mbetet i hapur, me qëllim që të sigurohet përfshirja e të gjithë nxënësve, në mënyrë që asnjë nxënës të mos mbetet pa tekste shkollore dhe materiale mësimore për vitin shkollor në vijim.”
Gjithashtu, MASHTI ka bërë të ditur se për çdo vështirësi teknike gjatë aplikimit, qytetarët mund të kontaktojnë në numrat e telefonit +383 (0) 38 200 65 058 dhe +383 45 834 248, ose në adresën elektronike [email protected]
“MASHTI siguron se të gjitha rastet e adresuara do të trajtohen me prioritet dhe do të ofrohet mbështetja e nevojshme për aplikim dhe përfitim nga ky program,” thuhet në fund të njoftimit.
