Ndërsa, ditëve të fundit edhe liderët politikë në Kosovës, kanë filluar ta pranojnë ekzistencën e një dokumenti të tillë.
I pari që e konfirmoi se e ka parë tekstin e marrëveshjes së mundshme, ishte kryetari i Aleancës për Ardhmërinë e Kosovës, Ramush Haradinaj, pas takimit të së premtes, që kishte me kryeministrin e vendit Albin Kurtin.
Pas konfirmimit të ekzistencës së këtij dokumenti, lindi pyetja sa a parashihet në të njohja reciproke mes Kosovës dhe Serbisë?
Ishte emisari amerikan, Gabriele Escobar, i cili gjatë vizitës në Kosovë, për herë të parë e përmendi mundësinë që të arrihet marrëveshja gjithëpërfshirëse, e më pastaj të vije njohja e ndërsjellë mes dy vendeve.
Nënkryetari i Aleancës për Ardhmërinë e Kosovës, Ardian Gjini, në emisionin “ResPublika” në tëvë1 tha se nga dokumentet që ka parë, ka elemente që e bëjnë të qartë njohjen e realitetit.
“A keni parë ju në këto dokumente ndonjë kërkesë të atyre që i shkruajnë që i propozojnë, që Serbia duhet ta njoh Kosovën? Ka elemente të cilat e bëjnë të qartë njohjen e realitetit në Kosovës, d.m.th të cilat munden me hap rrugë të tjera, por prap se prap unë po mendoj që të gjitha janë dokumente pune nuk ka dokument definitiv, nuk ka dokument përfundimtar”, tha Gjini.
Nga Qeveria e Kosovës, ende nuk e kanë komentuar përmbajtjen e dokumentit të cilin po e shqyrtojnë, e aq më pak çështjen se si ky dokument e akomodon njohjen e ndërsjellë. Fakti që marrëveshje mund të mos sjell njohjen e menjëhershme, ka sjell në diskutim modelin e dikurshëm, të njohur si modeli gjermano-gjerman.
Kronika e gazetarit Valmir Gallopeni.